Монголын үндэсний морин уралдаан, уяачдын холбоо болон Дэлхийн морьтнууд ТББ-аас монгол адуунд Монгол Улсын баатар цол олгох санаачилга гаргаснаа танилцууллаа.

Монгол адуунд төрийн дээд цол олгох нь түүний генофонд-удмын санг хамгаалах, цэвэр цусны байдлыг хадгалах, эрлийзжүүлэлтийн эрсдэлээс сэргийлэхэд чиглэсэн хууль тогтоомжийн хэрэгжилтийг улс төр, нийгмийн сэтгэл зүйн түвшинд баталгаажуулна гэж үзжээ. 

Монгол адуу нь монгол үндэстний ялагдашгүй хүч, тусгаар тогтнолын багана. Иймд баатар цол олгох нь түүхэн шударга ёсны илэрхийлэл бөгөөд монгол түмний нэгдмэл байдлыг хангах оюун санааны тунхаглал болно гэв. 

Ингэхдээ Монгол Улсын Цол, одон медалийн тухай хууль болон холбогдох дүрэм, журамд нэмэлт өөрчлөлт оруулж, "Монгол Улсын Баатар" цолыг түүхэн онцгой гавьяа байгуулсан "Үндэсний бахархалт амьд биет"-д олгох эрх зүйн үндэслэл бүрдүүлэх хэрэгтэй гэв.

Мөн энэхүү цолыг дагалдуулан монгол адууны удмын санг хамгаалах төрийн тусгай хөтөлбөрийг эрчимжүүлэх, үндэсний их баяр наадам болон бусад соёлын арга хэмжээнд монгол адууны үнэ цэнийг нэмэгдүүлэхийг уриаллаа.