Сербийн ЖУУЛЧИН: Наадмын үеэр Монголд ирэх нь миний олон жилийн мөрөөдөл байсан

Үндэсний их баяр наадам албан ёсоор эхэлж, Төв цэнгэлдэх хүрээлэнд нээлтийн ёслолыг үзэхээр олон мянган хүн цуглав. Тэдний дунд гадаадын жуулчид ч олон харагдана.

Зарим нь зураг авч, зарим нь монгол дээл өмсөн баярын уур амьсгалд оржээ. Тэд наадамд анх удаа ирж, Монголын соёл уламжлалыг сонирхож байгаагаа хэлж байв. Бид тэдэнтэй ярилцаж, сэтгэгдлийг нь сонслоо.

Польш улсаас ирсэн Маяа, Анна нар:

Миний оролцож байсан наадмуудаас хамгийн сонирхолтой нь байлаа. Үнэхээр олон зүйл болж байсан болохоор хаашаа харахаа ч мэдэхгүй байлаа. Гайхалтай. Их зүйл болж өнгөрлөө. Бидний төсөөллөөс давсан наадам байлаа.
Бид одоогоор бүх зүйлийг үзэж амжаагүй байгаа. Гэхдээ бид моринд дуртай ард түмэн, тийм болохоор морины уралдаан хамгийн их таалагдах байх.

-Та наадмыг бусад жуулчдад санал болгох уу?
-Тийм ээ, мэдээж. Туршиж үзэх ёстой баяруудын нэг. Яг л бяцхан олимпын нээлт шиг байлаа.

Испани улсын жуулчид Гийермо, Икер нар:

Яг л олимпын наадмын нээлт шиг гайхалтай байлаа. Үзүүлбэрүүд, хөгжмийн тоглолт, морьд гээд бүх зүйл үнэхээр сайхан байсан. Хүмүүсийн хувцаслалт, хөгжмийн хэмнэлд бүжиглэж байгаа байдал нь үнэхээр сэтгэл хөдөлгөм байлаа.
Бид хуушуур амсаж үзсэн, маш амттай байсан. Монгол мах үнэхээр таалагдсан.

Өнөө орой бид Монголын өмнөд хэсэг рүү ниснэ. Дараа нь Говь цөл болон бусад байгалийн үзэсгэлэнт газруудаар аялна. Бид наадмыг үзэх, хөдөө нутгаар аялах зорилготой аяллын багтай хамт явж байгаа.

Өчигдөр хурдан морины уралдаан үзсэн. Үнэхээр гайхалтай байсан. Бусад жуулчдад ч наадмыг заавал санал болгоно. Үнэхээр гайхалтай туршлага. Би бүр бага зэрэг уйлсан.

Серби улсын уран бүтээлч Бранша:

Би анх удаа Монголд ирж байна. Наадмын үеэр Монголд ирэх нь миний олон жилийн мөрөөдөл байсан. Би уран бүтээлч бөгөөд хөдөө орон нутагт болсон Ара фестивальд оролцсон.
Тэгээд хугацаагаа сунгаж, наадмыг үзэхээр шийдсэн. Монголчууд үнэхээр уриалгахан, эелдэг хүмүүс. Энд ирэх нь миний мөрөөдөл биелсэн хэрэг байлаа.