УИХ-ын чуулганы ээлжит хуралдаанаар Сонгуулийн ерөнхий хорооны дарга, гишүүнээс  чөлөөлөх тухай асуудлыг хэлэлцэж байна.

Сонгуулийн ерөнхий хорооны дарга П.Дэлгэрнаран ажлаас чөлөөлөгдөх өргөдлөө өгсөн. Дараагийн дарга томилогдох хүртэл  ажил үүргийг тасалдуулалгүй гүйцэтгэх үүргийг нарийн бичгийн дарга Д.Даваа-Очирт даалгасан тогтоолыг ТББХ гаргасан. 

Хэлэлцэж буй асуудалтай холбоотойгоор УИХ-ын гишүүн Б.Пүрэвдорж "Ард түмний амьдрал хэцүү байхад дарга нарын тоог нэмээд байх юм. Даажигнаад байгаа юм уу? Сүүлийн үед дарга нарыг томилж чөлөөлдөг л эрх баригчтай боллоо" гэв.

ШУУД ҮЗЭХ: 

Чуулганы хурлаар үргэлжлүүлэн Монголбанкны Ерөнхийлөгчийг томилох, чөлөөлөх тухай асуудлыг хэлэлцэж байна. Монголбанкны Ерөнхийлөгчийн албан тушаалд нэр дэвшигч С.Наранцогтын сонсгол энэ сарын 16-нд болсон юм. Түүнээс УИХ-ын гишүүн Б.Пүрэвдорж зээлийн хүүгийн дээд хэмжээг тогтоох тухай асуудлаар асуулт асуусан. 

Нэр дэвшигч С.Наранцогт "Банкнуудын зээл олголт 24 хувиар өссөн. Үүний эх үүсвэрийн 44 хувь нь хадгаламж эзэмшигчдийн мөнгө. Эрэлт их байгаа тул зээлийн өсөлт нэмэгдсэн. Тэр дундаа хэрэглээний зээл илүү өсөлттэй байна. Бүр нарийвчилбал тэтгэврийн зээл 44 хувьтай байна. Дотоод хадгаламж инфляцтай уялдаж байгаа" гэв. 

УИХ-ын чуулганы хурлаар Монголбанкны Ерөнхийлөгчийг томилох тухай асуудлыг хэлэлцэж байна. УИХ-ын гишүүд нэр дэвшигч С.Наранцогтод үг хэлж, асуулт асууж байна. 

УИХ-ын гишүүн Л.Мөнхбаясгалан "Маш хүнд цагт бид Монголбанкны Ерөнхийлөгчийг томилох гэж байна. Инфляц хоёр оронтой тоо руу орсон. ЭМДС хоосорсон. 22 мянган ААН дансаа хаалгасан. Энэ томилгоог дэмжинэ. Монголбанкны Ерөнхийлөгчөөр ёс зүйтэй, боловсролтой, шаардлагад нийцсэн хүн орж ирсэн. Гэхдээ энэ хүний ажлыг нь хийлгэхгүй байх хамгийн том саад нь Засгийн газар юм. 

Та Засгийн газрын үгийг дагавал та Монголбанкны хамгийн муу Ерөнхийлөгч болно шүү. Улс төрийн шахалтад битгий ороорой. Монголбанк Засгийн газрын халаасны банк байх ёсгүй" гэв.