2026 оны хөл бөмбөгийн Дэлхийн аварга шалгаруулах тэмцээн үргэлжилж байна. Улаанбаатарын цагаар өнөөдөр шөнө Япон болон Нидерланд улсын шигшээ багууд эхний тоглолтоо хийсэн. 

Тоглолт 2:2 гэсэн онооны харьцаагаар тэнцэж өндөрлөсөн юм. 

Тоглолтын эхний хагаст Нидерланд бөмбөг эзэмшилтээр илүүрхэж, аюултай довтолгоонуудыг хэд хэдэн удаа хийсэн. 

Хоёрдугаар үе эхлээд таван минут өнгөрөхөд Нидерланд өрсөлдөгчийнхөө хаалганд гоол оруулснаар тооны харьцааг нээсэн. 

Гэсэн ч долоон минутын дараа Япон хариуг нь барьж, тоог тэнцүүлж чадсан юм. 

64 дэх минутад Нидерланд дахин тэргүүллийг авсан ч үндсэн цаг дуусахаас хоёр минутын өмнө япончууд дахин нэг гоол хийж, өрсөлдөгчтэйгөө тэнцлээ. 

Ингэснээр F хэсгийн эхний тоглолтын дараа Япон болон Нидерланд тус бүр нэг оноотой болж байна. 

Тоглолт дууссаны дараа улсаа дэмжихээр ирсэн Японы дэмжигчид суусан хэсгийнхээ хогийг цэвэрлэж боссон нь дэлхий нийтийн анхаарлыг дахин татлаа. 

Японы хөл бөмбөгийн хөгжөөн дэмжигчид тоглолтын дараа хогоо цэвэрлэдэг соёл анх 1998 онд Францад болсон ДАШТ-д оролцох үеэр олны анхаарлыг татаж байв.

Түүнээс хойш тэд дөрвөн жил тутамд болдог дэлхийн аварга бүрт энэ соёлоо үргэлжлүүлсээр ирсэн юм.