ФОТО: Шинэ жилийн гоёлоо "тайлаагүй" Москва

Энэ сарын 9-12-ны өдрүүдэд УИХ-ын дарга н.Учрал ОХУ-ын нийслэл Москва хотод ажилласан. МИАТ компанийн 230 суудалтай онгоцоор дүүрэн хүн хойд хөршийн нийслэлийг зорив. Албаны, хувийн хэвшлийн болон хэвлэл мэдээллийн багийн төлөөлөгчид айлчлалын бүрэлдэхүүнд багтсан юм.

Биднийг очиход Москва хот цас ихтэй байв. Гурав хоноход өдөр бүр нойтон цас хаялсан. Сүүлийн 200 жилд ороогүй, их хэмжээний цас энэ өвөл оржээ. Хаа сайгүй ТҮК-ийн ажилчид харагдана. Өндөр барилгын дээвэр дээрээс ч цасаа шүүрдэцгээж байв.

Алтан Москвад очсон хүмүүсийн заавал үздэг газар нь Улаан талбай. Шинэ жилийн баяр өнгөрөөд олон хоносон ч Улаан талбай болон хотын төв баярын гоёлоо "тайлаагүй" байв. Гуравдугаар сард л гацуур мод, гэрлэн чимэглэлүүдээ хураадаг уламжлалтай юм байна. Хотын төвдөө мод бүрийг, бараг мөчир болгоныг гэрлээр чимэглэсэн нь угаас сүрлэг, сүрдмээр хотыг оройн цагаар улам үзэсгэлэнтэй харагдуулна. Эрчим хүчний хомстолгүй улс сайхан юм даа, ингэж гэрлээр чимэх нь аргагүй биз гэж эрхгүй бодогдоно.

Хотын төвөөр хятад, залуухан жуулчид хоёр гурваараа үе үе тааралдана. БНХАУ-ын жуулчид 30 хоног визгүй нэвтрэх болсноор тус улсын жуулчид сүүлийн үед ихэсжээ. Мөн хятадын цахилгаан машинууд зам дээр олонтоо харагдаж байв.

Барууны брэндүүдээс маш цөөхөн нь, голдуу бэлэн хувцасны брэндүүд Орост үлджээ. Тэдний орон зайг Добрый cola гэх мэт дотоодын үйлдвэрүүд, хятадын брэндүүд эзэлсэн аж.

Мушгиа гэх монгол үгнээс гаралтай, хотын яг төвөөр Москва гол урсдаг. Гол гэсэж, зайрмагтсан тул жижиг оврын усан онгоцнууд голоор хөвж эхэлжээ.