Мансууруулах, согтуурах донтой хүнийг эмчлэхэд тулгамдаж буй асуудал, гарц гаргалгаа сэдэвт хэлэлцүүлэг боллоо. Тус хэлэлцүүлгээр согтуурах, мансуурах донтой хүнийг эмчлэх эмчилгээний өнөөгийн нөхцөл байдлыг тодорхойлж, эмчилгээ үйлчилгээний хүртээмжийг нэмэгдүүлэх зорилготой юм.

Өнөөдрийн байдлаар согтуурах, мансуурах донтой хүнд үзүүлэх эмнэлгийн тусламж үйлчилгээг эрүүл мэндийн байгууллагууд, Сэтгэцийн эрүүл мэндийн үндэсний төв /СЭМҮТ/ зэрэг газрууд сайн дурын шинжтэйгээр үзүүлж байна.

Харин албадлагын шинжтэй эмчилгээг Шүүхийн шийдвэр гүйцэтгэх ерөнхий газрын Согтуурах, мансуурах донтой өвчтөнг албадан эмчлэх, албадан хөдөлмөр хийлгэх газарт хийж байна. Энэ тухай хуульд заасны дагуу

• анх удаа ирсэн бол 3-6 сар
• давтан ирсэн бол зургаан сараас хоёр жилийн хугацаанд эмчилгээ үйлчилгээнд хамруулах заалттайг хэлэлцүүлгийн үеэр танилцуулсан юм.

Гэмт хэргээс урьдчилан сэргийлэх ажлыг зохицуулах зөвлөлийн Ажлын албаны дарга Л.Нямгэрэл “Бид өнөөдрийн хэлэлцүүлгийн үр дүнд нөхөн сэргээх эмчилгээ буюу сэтгэл зүйн үйлчилгээ үзүүлэх, цаашид эдгээр хүмүүсийг нийгэмшүүлэхэд чиглэсэн сэтгэц-нийгмийн сэргээн засах төвүүдийг байгуулахаар зорьж байна.

Одоогийн байдлаар үүнийг хэрхэн шийдэх талаар хуульд тодорхой тусгасан зохицуулалт байхгүй. Олон улсын сайн туршлагаас харвал энэ ажлыг аль нэг төрийн байгууллага дэргэдээ авах биш, илүү олон нийтэд түшиглэж хийдэг. 
Өөрөөр хэлбэл энэ чиглэлээр үйл ажиллагаа явуулдаг аж ахуйн нэгж, төрийн бус байгууллагууд байж болно. Хамгийн гол нь мэргэжил, арга зүй талаас нь зөвлөж, чиглүүлэх мэргэжлийн эмч, сэтгэл зүйч ажиллахыг шаарддаг. Яг энэ чиглэлээр мэргэшсэн хүний нөөц дутмаг. Иймд хүний нөөцийг яаралтай бэлтгэх шаардлагатай байна.

Эхний ээлжид сэргээн засах төвүүдийг байгуулна. Энэ бол байшин, барилга шинээр барих асуудал биш. Аймаг, дүүргүүдийн эрүүл мэндийн төвийг түшиглэн байгуулж болно. Харин дараагийн алхам бол хууль тогтоомжид энэ талаар тодорхой тусгах, төсөв санхүүжилтийг гаргах юм” гэлээ.

Сэтгэцийн эрүүл мэндийн үндэсний төвийн захирал Г.Анхболд “Архи, мансууруулах бодис, мөрийтэй тоглоомд донтох эмгэг сүүлийн жилүүдэд манай улсад ихсэх хандлагатай байна. СЭМҮТ-ийн донтолтын тасаг 46 ортой. Гэтэл улсын хэмжээнд энэ нь хаана ч хүрэхгүй тоо. Манай төвийн хувьд аймаг, дүүргүүдэд буй сэтгэцийн кабинетыг өргөжүүлэх, хэвтэн эмчлүүлэх орны тоог нэмэх, донтох эмгэгтэй үйлчлүүлэгчид хамгийн гол эмчилгээ болох сэргээн засах төвийг байгуулахыг зорьж байна.
СЭМҮТ-ийн зүгээс мэргэжил, арга зүйгээр хангаж ажиллах ёстой. Өнгөрсөн жилүүдэд архинд донтох эмгэгийн талаар аян, хурал, сургалтыг олон удаа зохион байгуулсан ч төдийлөн үр дүнд хүрч чадаагүй. Харин одоо тусламж үйлчилгээг тэгш, хүртээмжтэй хүргэхэд анхаарах хэрэгтэй.

Эдгээр хүнд хамгийн чухал эмчилгээ нь нийгэм, хамт олонд тулгуурласан сэтгэц нийгмийн сэргээн засах эмчилгээ юм. Цуглаанд явах, сэргээн засах төвд очих, ганцаарчилсан болон бүлгийн сэтгэл засалд хамрагдах зэрэг. Гэтэл 7-10 хоног хэвтэн эмчлүүлээд гарах нь маш учир дутагдалтай. 3-6 сар, магадгүй хэдэн жилээр сэргээн засах тусламж үйлчилгээнд хамрагдаж байж үр дүнгээ өгдөг.

Хүний нөөц бас тулгамдсан асуудлуудын нэг байна. Өнгөрсөн онд гэхэд л донтолт судлалаар 12 эмч мэргэжилтэн бэлтгэгдсэн. Энэ тоог нэмэх шаардлагатай” гэв.

Гэрэл зургуудыг Г.Өнөболд