Монгол улсад анх удаа зохиогдож байгаа мэргэжлийн боксын WBA холбооны Төв Азийн аваргын бүсний төлөөх “Night of Champions, Ulaanbaatar-2025” тэмцээний жингийн үзлэг Баянгол зочид буудалд болж байна.

Монгол Улсын гавьяат тамирчин Эрдэнэбатын Цэндбаатар маргааш (2025.02.15) Мексикийн боксчин Педро Барнел Родригестэй Аса аренад тулалдана. Тэрээр таван тулаанд өрсөлдөгчөө хүнд цохилтоор буулгаж авчээ. Э.Цэндбаатар 2018 оноос мэргэжлийн боксоор тулалдаж эхэлсэн, нийт 11 тулаан хийжээ.   

Аваргын таван бүс цуглуулсан байна. 

Э.Цэндбаатар мэргэжлийн боксын WBA холбооны "Continental North America Gold" буюу Умард Америк Тивийн Алтан бүсийн аваргын төлөөх тулаанд 2024.10.18-ы өдөр ялсан юм. Тэрээр одоо 29 настай. Мэргэжлийн боксод 11-0 амжилтай, тивийн бүстэй болсноор WBA холбооны цаашдын томоохон тулаануудад оролцох боломжтой болжээ.

Гэрэл зургуудыг Т.Бархас

Өнгөрсөн оны 10-р сард WBA холбооны "Continental North America Gold" буюу Умард Америк Тивийн Алтан бүсийн аварга болсон Э.Цэндбаатар мэргэжлийн боксод 11-0 амжилттай бол түүний өрсөлдөгч Педро Бернал Родригес 14-1-2 амжилттай.

Өмнөх тулаандаа "Super featherweight" буюу 57-59 кг жинд оролцсон 29 настай Э.Цэндбаатар энэ удаа "Lightweight" буюу 59-61.2 кг жинд тулалдана.

ASA Arena-д болох тулааны өдөрлөгт үзэгчдийн сонирхлыг татсан нэгэн тулаан болох нь Нямбаярын Төгсцогт болон Марк Сэйлс нарын тулаан юм.

Мэргэжлийн боксод 12-2-1 амжилттай, 32 настай Н.Төгсцогт 2022 оноос хойш тулаанд оролцоогүй байсан бөгөөд өнгөрсөн жил хар тамхины хэрэгт холбогдсон тухай мэдээллүүд гараад байв. Гурван жилийн дараа мэргэжлийн тайзанд дахин тулалдах түүний өрсөлдөгч нь Филиппиний 28-50-5 амжилттай, 43 настай ахмад тамирчин Марк Сэйлс байх юм.

Мөн энэ өдөрлөгт

• Отгонбаатарын Бямба-Эрдэнэ мэргэжлийн боксын хоёр дахь тулаанаа Энэтхэгийн Сунил Кумартай
• Төгөлдөрийн Бямбацогт мэргэжлийн боксын гурав дахь тулаанаа Узбекистаны Рахматиложон Шарифовтой
• Халигийн Бекнур мэргэжлийн боксын анхны тулаанаа Киргизийн Бекболсун Токтосун Уулутай
• Хархүүгийн Энх-Амар мэргэжлийн боксын хоёр дахь тулаанаа Филиппиний Майкл Эскобиатай
• Баярсайханы Энх-Амгалан мэргэжлийн боксын гурав дахь тулаанаа Узбекистаны Иброхим Абдуллаевтай тус тус хийнэ.