“Your Valentine” тоглолтын хэвлэлийн хурал хоёрдугаар сарын 16-нд 20:00 цагт Holiday Inn зочид буудалд болсон. Тэнд сэтгүүлчид цуглав. MC Sniper-ийг, Bloo-г, Kim Hyun Joong-ийг тэнд анх удаа тийм ойроос харсан залуухан сэтгүүлч алгаараа амаа таглаад итгэн ядаж, тэгснээ яагаад, юунаас ч болсон юм бүү мэд, сэмхэн нулимсаа арчив. Хайрлаж, хүндэлж, биширч, сонсдог уран бүтээлчдээ хараад ингэтлээ сэтгэл догдолж, тэр догдлолоо огт нуулгүй илэрхийлж чаддаггүй явснаа бодож, тэр охиныг нэг их хайр тээсэн нүдээр харж зогслоо, би.

Өнгөрсөн хэд хоногт Монголчуудын зарим нь “Солонгосоос хэдэн дуучин ирсэн юм байх аа” хэмээн өнгөрүүлсэн бол, хэсэг нь дээр дурдсан сэтгүүлчийн адил “Энэ чинь MC Sniper, Bloo, Kim Hyun Joong шүү дээ” хэмээн зүрхээ дарж догдоллоо. Тэд буцаж, мэдрэмж үлдэв. Энэ бүхний ард хэн байв, тэднийг Монголд урьж, тоглолтыг нь зохион байгуулах санаа хэнийх юм бол?

"Your Valentine" тоглолтын ерөнхий зохион байгуулагч, Эвандис Энтертайментийн гүйцэтгэх захирал Жон Ко буюу  Ко Сунг Хун (Солонгос нэр: Ko Sung Hun)-тай ярилцлаа.

-Тоглолт үзсэн үзэгчийн хувьд юуны өмнө танай багт баяр хүргэе. Тэр үдэш, тэр танхимд үнэхээр халуун, дулаан уур амьсгал бүрдсэн. Энэ тоглолтыг зохион байгуулах санаа анх хэнд, хэрхэн төрсөн бол?
-Баярлалаа. Ер нь бол энэ тоглолтыг зохион байгуулах санаа  “Би Монголыг мэдэж байна. Харин үүнийг Солонгос хүмүүст яаж илүү таниулж болох вэ” гэдэг ярианаас л эхлэлтэй. Монгол, Солонгос дахь албаны хүмүүстэй ажил хэргээр болон монгол найзуудтайгаа уулзахдаа ч хоёр орны уран бүтээлчдийг оролцуулсан том тоглолт зохион байгуулах юм сан гээд л их ярьдаг байсан.

Монгол миний хоёр дахь эх орон.

Би Монголд ээж, аавынхаа хамт ирж, багаасаа амьдарч байгаа. Тиймээс Монгол миний хоёр дахь эх орон гэж боддог. Би хөгжимд маш их дуртай. Тиймээс хөгжмөөр, урлагаар дамжуулан хүмүүсийг хооронд нь хэрхэн холбож, Монгол Улсыг Солонгост, цаашлаад дэлхийд яаж таниулж болох вэ гэдгийг бодож явдаг юм. Нэг боломж нь тоглолт зохион байгуулах байсан. Учир нь хүмүүс эх хэлээрээ ойлголцохгүй байж болох ч хөгжмөөр нэг болж чаддаг шүү дээ.

-Та тоглолтын үеэр ч тайзан дээрээс Монголыг дэлхийд таниулах зорилготой гэж хэлж байсан. Яагаад гэж асуумаар байна?
-Дээр хэлсэнчлэн би бага наснаасаа Монголд амьдарч байна. Тийм болоод ч тэр үү Монгол орон, монгол хүмүүс гэр бүл минь юм шиг санагддаг болсон. Хүний баяртай, гунигтай аль ч үед гэр бүл хамт байдаг, хамгийн түрүүнд бодогддог маш том орон зай шүү дээ.

Монголд амьдрахад заримдаа хэцүү, хүндрэлтэй санагдах үе байдаг. Нэг удаа гадаадаас найз маань ирээд Монголын талаар таагүй зүйл хэлэхэд надад тэр нь маш муухай санагдсан.

Тэр үед л би өөрийгөө “Өө би чинь энэ улсыг үнэхээр хайрладаг юм байна шүү дээ” гэж өөрийгөө анзаарсан. Харин эсрэгээрээ Солонгосоос хүмүүс ирээд Монголыг гайхан магтахад гоё сайхныг нь мэдрүүлж, таниулж чадлаа гээд маш их баярладаг. Тэгэхээр энэ гайхалтай байгалийг, соёлыг ганцаараа мэдээд байх биш “Монгол ийм сайхан орон шүү дээ” гэж таниулж Монголын тухай, Монгол хүмүүсийн тухай илүү их сурталчилж, илүү их ажил хиймээр байна.

-MC Sniper, Bloo, Kim Hyun Joong нарыг Монголд урихаас эхлээд өнөөдрийг хүртэл нүсэр ажил болсон нь мэдээж байх. Зохион байгуулалт үнэхээр сайн байсан гэж би үзэгчийн хувьд дүгнэсэн. Харин зохион байгуулагчид өөрсдөө ямар сэтгэгдэлтэй байна вэ? Та нар чадсан уу?
-Үнэнийг хэлэхэд тийм ч амар байгаагүй (инээв.сур). Сэтгэл хөдлөлөөр эхлүүлсэн ч гадаадын уран бүтээлчдийг урьж тоглолт зохион байгуулахад харилцаа, санхүүгээс эхлээд маш олон асуудал тулгарсан. Төсөөлснөөс ч хэцүү байсан. Гэхдээ бууж өгөхийг хүсээгүй. Нэг зорилгын төлөө цугларсан маш олон хүний хүчээр энэ бүхнийг давлаа.

Нийт 150-200 хүн арын албанд ажилласан. Нэг сарын турш манай багийнхан өдөрт 2-3 цаг л унтсан даа. Одоо ч харвал бидний нүдний доогуур ядарсныг илтгэх хөх туяа татсан байгаа.  Тоглолт зохион байгуулах багийн хүн болгон өдөрт бараг нэг удаа уйлсан байх (инээв.сур). Гэхдээ тоглолтыг үзээд үнэхээр сэтгэл хангалуун байгаа үзэгчдийн халуун дулаан уур амьсгалаас манай багийнхан урам зориг авсан байх гэж бодож байна.

Уран бүтээлчид Монголын тухай үнэхээр сайхан сэтгэлтэй буцсан.

Гэхдээ би энд нэг зүйлийг тодотгож хэлмээр байна. Тоглолт зохион байгуулах багийг хүчилж, гуйж цуглуулаагүй. Үнэхээр Монголоо таниулчих юм сан гэсэн залуус энд, тэндээс аяндаа л цугларчихсан. Аливаа шийдэх асуудал тулгараад “Одоо яах вэ” гэхэд л зөв цагт зөв хүмүүс гарч ирж тусалж, дэмжсээр бид энэ бүхний ард хамтдаа гарлаа. Ирсэн уран бүтээлчдээс хамгийн сүүлд (2024.02.20) MС SNIPER буцлаа. Би лав одоо хоёр, гурав хоног орноосоо босохгүй байх.

-Та уйлсан уу?
-Би байнга л уйлсан (инээв.сур). Тоглолтын үеэр дуулахад миний хоолой гарахгүй, зангираад байсан.

-Солонгосоос ирсэн уран бүтээлчид Монголын тухай ямар сэтгэгдэлтэй буцав?
-Тоглолтын үеэр тайзны ард Ким Хён Жун надад “Миний гадаадад хийсэн тоглолтуудаас хамгийн гоё нь энэ удаагийнх байлаа. Монголчууд намайг ийм гоёор хүлээн авна гэж үнэхээр бодоогүй, миний сэтгэл маш их хөдөллөө” гэж хэлсэн. Би түүний хэлснийг сонсоод дахиад л уйлсан (инээв.сур). Тэр бас тусгайлан зурвас илгээсэн. Зурваст “Монголыг би дахин нэг удаа өөрөөр харлаа. Бүх зүйлд баярлалаа, чиний цаашид хийх бүх ажилд хамтран ажиллах бодолтой байна. Монголд маш сайхан байлаа” гэсэн байсан.

Уран бүтээлчид Монголын тухай үнэхээр сайхан сэтгэлтэй буцсан. Тэдний зарим нь анх ирэхдээ “Монголд ийм тоглолт зохион байгуулах боломжтой гэж үү” гэх зэргээр сонирхож асууж байсан. Энэ бүхнийг сонсоод Монгол ийм сайхан хөгжсөн, үзэсгэлэнтэй байгальтай орон шүү гэдгийг таниулж, мэдрүүлэх л миний үүрэг юм байна гэж зорьсон.

-Монголд ирэх дараагийн уран бүтээлчид хэн байх бол?
-Одоохондоо нууц. Үзэгчдийнхээ урмыг хугалахгүйн тулд илүү сайн уран бүтээлчдийг Монголд урихыг хичээнэ. Дараагийн тоглолт илүү чанартай, үр дүнтэй болох байх гэж найдаж байна.

-Таныг тайзан дээр дуулж байхад хажууд зогссон үзэгч “Энэ хэн бэ” гэж надаас асуусан. Нээрэн Жон Ко гэж хэн бэ?
-Амархан юм шиг хэрнээ хэцүү асуулт байна (инээв.сур) Би Монголд амьдардаг л солонгос хүн. Монголыг үнэхээр их хайрладаг, олон монгол найзтай. Бас хөгжимд маш их хайртай.

Ким Хён Жун надад “Монголчууд намайг ийм гоёор хүлээн авна гэж үнэхээр бодоогүй, миний сэтгэл маш их хөдөллөө” гэж хэлсэн.

-Та монголоор маш сайн дуулдаг юм билээ. Монгол уран бүтээлчдээс хэнийх нь шүтэн бишрэгч вэ?
-Би хамгийн анх дуучин Д.Болдын “Би түүнийг харснаас хойш” гэдэг дууг монголоор дуулж сурч байсан. Тиймээс дуучин Болдыг хүндэтгэж явдаг. Мөн Чойжоо, бас A sound.

-Миний асуугаагүй таны ярихыг хүссэн зүйл үлдсэн бол нээлттэй?
-Би ганцаараа байсан бол энэ бүхнийг хэзээ ч хийж чадахгүй байсан. Тиймээс тоглолтод ажилласан хүмүүс, уран бүтээлчид, компаниудад маш их талархсанаа илэрхийлмээр байна. Маш олон хүн оролцсон учраас хүн бүрийг нэрлэхэд их цаг орох тул Монгол, Солонгос гэж ялгаралгүй нэг зорилго дор нэгдсэн хүн нэг бүрд үнэхээр их баярлалаа. Тоглолт амжилттай болсон гэж үзвэл үр дүн, магтаал сайшаалыг тэр хүмүүс хүртэх ёстой, дахин баярлалаа.

Монголыг таниулах зорилго дор ивээн тэтгэгч, бусад хүмүүстэй уулзахад маш найрсаг хүлээн авч дэмжиж, тусалсанд би хамгийн их баярлаж байна. Тухайлбал, МИАТ ТӨХК-ийн удирдлагатай очиж уулзаад бид ийм тоглолт хийх юм, Солонгосоос уран бүтээлчид ирэх гэж байгаа, бид энэ тоглолтыг ашиг олох гэж биш хоёр улсын харилцааны цаашдын хөгжлийн төлөө зохион байгуулж байгаа гэхэд  “Өө за, бид яаж туслах вэ” гээд маш гоёор хүлээн авсан.

Тоглолт амжилттай болсон гэж үзвэл үр дүн, магтаал сайшаалыг тэр хүмүүс хүртэх ёстой, дахин баярлалаа.

Дараа нь “Holiday Inn” зочид буудлын удирдлагатай уулзахад “Энэ чинь Монголын нэр хүндтэй хамааралтай асуудал шүү дээ” гээд бид хамгийн тав тухтай гэсэн өрөөнүүдээ гаргаж өгч тусалъя гэсэн.

Бас Солонгос улсаас ирэх уран бүтээлчдээ тосох унаа хэрэгтэй болсон. Ингээд UBCAB компанийн удирдлагад хүсэлт илэрхийлэхэд “Тэгэлгүй яах вэ” гээд мөн л хамгийн тав тухтай автомашинуудаа жолоочтой нь хамт гаргаж өгсөн. Тэд 3 шөнө 4 өдрийн турш бидэнд үйлчилж тусалсан. Энэ бүхний эцэст ирсэн уран бүтээлчид үнэхээр сэтгэл ханамжтай буцлаа. Зүрх, сэтгэлээрээ олон залуус нэгдсэн учраас тоглолт амжилттай дуусаж, ард нь гарч чадлаа. Бүх хүнд дахин, дахин талархлаа. 

-Ярилцсанд баярлалаа. Ажилд нь, Монголыг дэлхийд таниулах дараа, дараагийн төслүүдэд нь өндөр амжилт хүсье.