Цасан мөсөн бүрхээд цан хүүрэг савсан байна. Будрах цас, бор шувуудын жиргээ өвлийн ойд угтлаа.

Утаа униар, стрессээс холдон ууланд гарч уушгиа баярлуулах сайхан. Урт амьсгал авч, сэрүүн салхины цэнгэгийг мэдрэх нь Зүрх уулыг зорих шалтгаан.

Модтой, алхаж, амрахад зориулан тохижуулсан, хот дотор ойрхон гээд Чингэлтэй Хайрханы Зүрх ууланд очих дуртай иргэд олширсон.

Тиймдээ ч найз нөхдөөрөө, аав ээжтэйгээ, ахан дүүс, хүүхдүүдтэйгээ энд ирж байгалийн сайханд амарч саатдаг болжээ.

Налуу бөгөөд алхах замыг тэгшлэн зассан тул тэрэгтэй хүүхэд түрэхэд, ахмад настан алхахад чилж ядрах нь бага. 30-50 алхам тутамд л сандал, саад зэхсэн учраас аахилж цуцахгүй.

Тэр бүрд амарч суугаад салхины сэрчигнэх чимээ, моддын шуугих дууг сонсоод олон хүний жаргалтай байгааг ажиглаад суух боломжтой.

Эргэлдэн нисэх шувуудын жиргээ сэтгэл сэргээж, хүүхдийн баясах дуу амгаланг авчрах шиг сайхан санагдуулдаг газар.

Уулын оройд хүрэхэд ердөө 500 метр орчим л болно. Эцэж, ядрахгүй модод дунд хүрдэг гээд хүмүүс ам сайтай.

Оройд гарвал, бие бялдаржуулах, дасгалын төхөөрөмжүүд бий. Өвөл, зун, хавар, намарт хүн зоноор дүүрэн. Тиймээс бие засах модон жорлонг байрлуулжээ.

Хүн байгаа газар, хөгжил цэнгэл, хийх зүйлс олон. Ууланд ирсэн хүмүүс цасан хүн хийж, дээш харан хэвтэн цаснаа эрвээхий хэлбэрийн мөр үүтгэжээ.

Сайн анзаарвал олон янзын шувууд, ан амьтдыг анирдаж болно. Тэд ойд амьдарч буйгаа илтгэн цасанд мөрөө үлдээж хэрээд гүйлдсэнийг үлгэрлэн ярьж хүүхэдтэйгээ хөгжилдөх боломжтой.

Ойн амьтдаас хүнд хамгийн нээлттэй нь болжмор. Цасан доороос хоол хүнс эрж, нэг мөчрөөс нөгөөд дамжин ниснэ.

Мөн шувуу, шоргоолж зэрэг олон амьтдын үүрийг харж болох тул танин мэдэхүй ч хөгжих давуу талтай.

Оройд гарч ирснээр цааш салбарлан үргэлжлэх уул нурууд, хотгор гүдгэр, хадан цохио, шүтээн овоо зэрэг харагдана. Тиймээс илүү хол алхахыг хүсвэл зурайн тодрох жим дагаж болох юм.

“Чингэлтэй уулын арын их ой мод үргэлжилсээр хэнтийн нурууны ноён оргил Асралт хайрхан түүнээс Бухын зоо хэмээх ян хөвчтэй залгадаг. Ой мод нь шинэс, нарс, хуш, гацуур, хус, хайлаас гээд монгол газар ургадаг бүх модыг багтаасан холимог ойтой. Ургамлын сангийн хувьд маш баялаг. Тухайлбал сэржмядаг, жамъянмядаг, юмдүүжин гээд үзэсгэлэнтэй сайхан цэцгүүд ургадаг. Дэгд, гоньд, халиар, гандигар, агь, жууцай, сөд, бамбай, даль, нохойн хошуу зэрэг эмийн төрлийн ургамал мөн үхрийн нүд, хад, нэрс, аньс, гүзээлгэнэ зэрэг жимс элбэг.

Эндэх тохижуулалтаас нарны эрчим хураагуурт гэрэл, камерын хяналтыг онцлууштай.

Зүрх ууланд хэрхэн очиж болохыг ЭНД дараад газрын зургаас хараарай. Эгц өөд явсаар хүрдэг уулын замд цас, мөс тогтож, халтиргаа гулгаа үүссэн байсан тул техникийн аюулгүй байдлаа хангаж очоорой.

Ийшээ байнга зорчдог нийтийн тээвэрт суугаад ирэх боломжтой. Хамгийн эцсийн зогсоолыг дараах зургаас харна уу.

Санамж: Байгалийн сайханд амарч зугаалахдаа элдэв хог хаягдал үүсгэсэн бол буцахдаа яваад явдаг зөв хандлагатай иргэн байгаарай.