УИХ-ын чуулганы өнөөдрийн (202.12.04) хуралдаан эхэллээ. Хуралдаанаар дараах асуудлыг хэлэлцэх товтой байна. Үүнд:

• Малын индексжүүлсэн даатгалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл /Засгийн газар 2025.01.09-ний өдөр өргөн мэдүүлсэн, анхны хэлэлцүүлэг, асуулт, хариулт 90 минут/
•  “Тогтоолд нэмэлт оруулах тухай” Монгол Улсын Их Хурлын тогтоолын төсөл /Засгийн газар 2025.11.19-ний өдөр өргөн мэдүүлсэн, анхны хэлэлцүүлэг, асуулт, хариулт 90 минут/
• Монгол Улс болон Евразийн эдийн засгийн холбоо, түүний гишүүн орнууд хоорондын худалдааны түр хэлэлцээрийг соёрхон батлах тухай хуулийн төсөл болон хамт өргөн мэдүүлсэн хуулийн төслүүд /Засгийн газар 2025.11.28-ны өдөр өргөн мэдүүлсэн, хэлэлцэх эсэх, асуулт, хариулт 120 минут/

Засгийн газраас энэ оны нэгдүгээр сард өргөн мэдүүлсэн Малын индексжүүлсэн даатгалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийн анхны хэлэлцүүлгийг хийж, гишүүд асуулт асууж, хариулт авч байна. 

УИХ-ын гишүүн О.Алтангэрэл:

-Мал малчны асуудал ярьж байхад ХХААХҮ-ийн сайд нь хаачсан юм бэ. Уг нь малчны асуудал яриад байх юм. Уул уурхайн сайд ч алга, хөдөөгүүр түлээ, түлш олдохгүй байна шүү дээ. Малчдын гол тээврийн хэрэгсэлд ашигладаг дизель түлш олдохгүй, өвс тэжээл, хоол хүнсээ татаж, хоёр өдрийн амралтаар хүүхдээ дотуур байрнаас гэртээ аваад ирж чадахгүй байна.

Суманд АИ92 шатахуун шаг болчихсон, 3500 төгрөгийн үнэтэй болжээ. Гэтэл мал, малчинтай холбоотой асуудал ярьж байхад сайд нь алга. Сэтгэл нь яасан өвддөггүй юм бэ. Хээр гадаа отроор явж байгаа, түлээ түлшгүй малчид ядарч байна. Сүхбаатарын талбайд ирж жагсахгүй, хөдөө орон нутгаас ирж чадахгүй болохоор нь дээрэлхэж байгаа юм уу. Амьдрал нь хүнд байна шүү дээ.