“Улсын хэмжээнд 8000 км хатуу хучилттай зам бий. 1м.кв зам засахад 115 мянган төгрөгийн өртөгтэй. Улсаас батлагдсан төсөв нийт замын 10-12 хувийг л засахад хүрэлцэж байна. Тиймээс энэ оны наймдугаар сарын 1-ээс эхлэн орон нутгийн замд зорчсон тээврийн хэрэгслээс авдаг 1000 төгрөгийг 5000 төгрөг болгож нэмэгдүүлнэ” гэж Зам тээврийн хөгжлийн төвийн захирал Д.Оюунболд мэдээллээ.

Тэрбээр, “Суудлын тээврийн хэрэгслийн төлбөрийг тав дахин, том оврын ачааны тээврийн хэрэгслийнхийг хоёр дахин нэмэгдүүлэх зохицуулалт хийсэн. Иргэдээс авч буй зам ашиглалтын төлбөрийг замын засвар, өвлийн болон зуны арчлалтад зарцуулдаг. Мөн урсгал засвар буюу нүх бөглөх, хөвөө гагнах зэрэг арчилдаг.

Төлбөр авах цэгүүдээр нэвтэрсэн тээврийн хэрэгслийн тоо, төвлөрсөн орлого, зарцуулалтыг цахим хуудасдаа нээлттэй, ил тод байрлуулахаар  ажиллаж байна.

Өнгөрсөн онд төлбөр авах 33 цэгээр дамжуулж 33 тэрбумын орлогыг төвлөрүүлсэн. Төлбөр нэмснээр замаа засаж сайжруулах, стандартжуулах боломж бүрдэх юм.

Байнгын зорчигч буюу улсын чиглэлийн зам дээр үйл ажиллагаа явуулдаг иргэд, аж ахуйн нэгжүүд төлбөрөө урьдчилж төлснөөр нийт төлбөрөөс 30 хувь хүртэл хямдарна. Иргэд, аж ахуйн нэгжүүд жилийн хугацаанд хэдэн удаа зорчих тоогоо урьдчилан мэдүүлж, Зам тээврийн хөгжлийн төвтэй гэрээ байгуулах юм.

Эмээлт, Батсүмбэр, Налайх, Хан-Уул дүүргийн иргэд e-Mongolia болон Зам тээврийн хөгжлийн төвд машины серийн дугаараа бүртгүүлснээр төлбөрөөс чөлөөлөгдөнө. Энэ оны аравдугаар сарын 1-ээс эхлэн дээрх бүс нутагт байрших төлбөр авах цэгүүдийг нүүлгэх ажил хийгдэнэ” гэж Д.Оюунболд тайлбарлалаа.  

Мөн тусгай албаны машинууд болон тусгай хэрэгцээт иргэдийн машинаас төлбөр авахгүй.

Зам тээврийн сайдын баталсан А/226 журамд, 

-Тээврийн хэрэгсэл нь төлбөр авах цэгээр 20 удаа саадгүй нэвтрэх бөгөөд цахим нэхэмжлэлээ төлөөгүй 21 дэх удаагийн нэвтрэлтээс төлбөр авах цэг дээр саатуулж, боломжит арга хэрэгслээр төлбөрийг бүрэн төлүүлэх арга хэмжээ авах

-Авто зам ашигласны төлбөрийн цахим нэхэмжлэлээ 30 хоногийн дотор төлж барагдуулаагүй тохиолдолд хоног тутам 0.5 хувийн алданги тооцно зэрэг зохицуулалттай болсон билээ.

Төв аймгийн Лүн, Эрдэнэсант орчимд их засварын ажил эхлэх гээд бэлтгэл ажил хийж эхэлжээ.

Хот хоорондын зорчигч тээврийн хэрэгслүүдэд хөнгөлөлт урамшуулал олгох журам батлах судалгааны ажил хийгдэж байна.