УИХ-ын хаврын чуулган эхэлснээс хойш чуулганы нэгдсэн хуралдааныг Төрийн ордны А танхимд хийж байна.  УИХ-ын 2024 оны ээлжит сонгуулиар гишүүдийн тоо 126 болж нэмэгдэх  тул чуулганы нэгдсэн хуралдааны танхимд засвар хийж байна. Засварын ажилд хэдий хэрийн хөрөнгө зарцуулж байгаа талаар УИХ-ын Тамгын газрын дэд дарга Ц.Батбаатараас тодрууллаа.

-Чуулганы нэгдсэн танхимд хийж буй их засварын санхүүжилтийг 2024 оны улсын төсөвт тусгасан уу?
-2024 оны улсын төсөвт УИХ-ын хэвийн үйл ажиллагааг хангахтай холбоотой үйл ажиллагаанд 22 тэрбум төгрөг төсөвлөсөн. Чуулганы их танхимд хийж буй засварын ажлыг энэ санхүүжилтийн хүрээнд хийх юм.  

Мөн одоо чуулганы танхимд ашиглаж буй “Bosch” брэндийн аналоги системийн микрофоныг 2014 оноос ашиглаж байна. Одоо энэ системийн микрофоныг үйлдвэрлэхээ больсон тул бүрэн шинэчилж, дижитал системд шилжүүлнэ.

-Гишүүдийн ширээ, сандлын тоо нэмэгдэнэ. Шинээр авах ширээ сандлыг одоогийнхтой ижил загвараар хийлгэх үү?
-УИХ-ын чуулганы танхим дахь гишүүдийн ширээг анх Лаос улсын буцалтгүй тусламжаар хандивласан. Гишүүдийн тоо нэмэгдсэнтэй холбоотой мөн Лаос улс буцалтгүй тусламжаар өгсөн, ширээ нь Монголд ирсэн байгаа.

-Чуулганы танхимын их засварын ажил хэзээ дуусах вэ?
-2024 оны УИХ-ын сонгуулийн үр дүнгээр байгуулагдах шинэ парламент ажиллаж эхлэхэд чуулганы танхим бэлэн байх ёстой гэв.