Хотын дарга Д.Сумъяабазар өнөөдөр Засгийн газрын хуралдаанд орж, нийслэлийн замын түгжрэлийг шийдвэрлэхийн тулд хийх ажлуудаа танилцуулжээ. Үүний дараа хэвлэлийн хурлаар 420 тэрбум төгрөгийн төсвөөр эхлүүлэх есөн ажлаа тайлбарласан юм. Энэ үеэр сэтгүүлчид түүнээс Үндэсний хөрөнгө оруулалтын банкны талаар тодруулав. УИХ-ын Төсвийн байнгын хорооны дарга Ч.Хүрэлбаатар Үндэсний хөрөнгө оруулалтын банканд байршуулсан “Эрдэнэт” үйлдвэр, ЭТТ ХК болон төрийн сангууд мөнгөө эргүүлэн авч чадахгүй байна гэсэн юм.                 

Хотын дарга:

-Би энэ асуултад хариулъя. 2021 оны долдугаар сараас хойш над руу зохион байгуулалттайгаар дайрч байна. Одоо цадигаа алдлаа. Би улс төрийн дайралтыг тэвчинэ. Гэхдээ энэ зохимжтой зүйл биш. Эдийн засаг амаргүй байгаа үед ААН-үүд ч хүнд байдалд байна. Би Хөрөнгө оруулалтын банкны удирдлагуудад давхар шаардлага хүргүүлсэн. Банкууд эх үүсвэр татахдаа хадгаламж хэлбэрээр татдаг. Үндэсний хөрөнгө оруулалтын банк гэрээ, төлбөр тооцоо, эргэн төлөлтийн хугацаа зөрсөн бол та бүхэн анхаарч, зохицуулах ёстой гэж би хэлсэн. Олон нийтийн санаа бодлыг улс төрд ашиглаж байна. Банкны салбар маш эмзэг. Мөн Төв банкны хяналт дор ажилладаг.     

Банк хэдийг нь өгөх, ямар эх үүсвэр дутуу гэдгээ ч ил тод мэдээлэх нь зөв. Төрийн сангийн мөнгийг банк эргүүлэн төлөх ёстой. Би энэ банкны ажлаа 8 жилийн өмнө өгсөн. ЭТТ, “Эрдэнэт” үйлдвэрийн мөнгийг энэ онд багтаан төлнө гэж надад банкны удирдлагууд хэлсэн. Банкны тухай шинэ хуулийн дагуу хөрөнгө оруулагч нартай уулзаж байгаа юм билээ. Над руу дайрч байгаад харамсаж байна. Би хэзээ ч мохохгүй. Нэр төр эрхэм гэв.

Энэ хариултаас тэрээр Үндэсний хөрөнгө оруулалтын банк төлбөр түргэн гүйцэтгэх чадамжгүй болсныг батлав.