Энэ сарын 5-нд Лондонгийн хөрөнгийн бирж (LSEG)-ээс зохион байгуулсан “Financial Markets Connect 2025” бага хуралд оролцлоо.

Энэ удаагийн хурлаар тодорхой бус байдал өндөр орчинд мэдээллийг зөв удирдан ашиглахад хиймэл оюун (AI)-ийг хэрхэн ашиглахад голлон төвлөрлөө.

Хурлын үндсэн, сонирхолтой илтгэлийг  Andrew Busch “AI Unleashed: Growth and Opportunities” сэдвээр хийлээ. Түүний  илтгэлийн эхэнд глобал эдийн засгийн өнгөрсөн (КОВИД, дайн, инфляц), одоо (тодорхой бус байдал, Хятадын өсөлтийн сааралт, энергийн үнийн уналт), ирээдүй (эдийн засгийн  өсөлтийн сааралт)-г авч үзсэн.

Ингэхдээ эдийн засгийн загвар, аргачлалаар гаргасан төсөөлөл бодит байдлаас зөрөхөд таамаглах аргагүй “X” хүчин зүйлс (Xfactors) нөлөөлж байгааг онцолж, 2025 оны байдлаарх цаашдын төлөвт нөлөөлөх 10 “X” хүчин зүйлсийг нэрлэлээ.

Үүний эхний гуравт Хятадын эдийн засаг, тарифын дайн-нийлүүлэлтийн сүлжээний тасалдал, тодорхой бус байдлаас үүдэлтэй эдийн засгийн уналтыг нэрлэв. Тэр дундаа глобал өсөлтийн төлөвийг таамаглах функцийг сонирхолтой хэлбэрээр санал болгосон:

Global GDP f(x)=#CB rate cut+China stimuls+US tax cut/spending-Tariff-Xfactors

Урт хугацааны эрсдэл
1) АНУ-ын өрийн тогтворгүй байдал,
2) Глобал худалдааны алдагдлаас үүдэлтэй тогтворгүй байдал (Герман, Хятадаас бусад орнууд худалдааны алдагдалтай),
3) Уур амьсгалын өөрчлөлт, хэлбэлзэл улам нэмэгдэх, даатгалын зардал өсөх зэргийг нэрлэсэн.

Трамп ерөнхийлөгчийн тарифын бодлогод шүүхээс хориг тавьж буй хэдий ч, тариф тавих боломжийг нээсэн өөр долоон хууль үйлчилж буй тул шүүхийн маргаанаас болж энэ бодлого өөрчлөгдөхгүй гэнэ. АНУ-Хятадын худалдааны хэлцэл хийх 90 хоногийн хугацаа, Европын холбоонд өндөр тариф тавих хугацаа 7 сарын 9-нд эхэлнэ.

Энэ үед маш том цохилт дахин ирэхэд одооноос бэлдэх хэрэгтэй. Үүний дараагийн хэсэг нь хиймэл оюун (AI)-ыг АНУ, Европын холбоонд хэрхэн зохицуулж буй байдал, AI-ийн өсөлт, боломжид төвлөрлөө.

AI-ийн хөгжүүлэлтэд АНУ тэргүүлж, Хятад удаалж байгаа бол, Их Британи, Израил, Канад, Герман, Энэтхэг, Сингапур тэргүүлэх орнуудад оржээ.

Түүнчлэн AI, Gen AI, Agentic AI гурвын ялгааг тайлбарлаж, эдгээр, тэр дундаа Agentic AI  нь бизнест цаг хугацааг хэмнэх, бүтээмжийг өсгөх, эрсдэлийн хяналтыг сайжруулж, зардлыг бууруулж, ашигт ажиллагааг өсгөхөд чухал хувь оруулж эхэлснийг онцолсон.

Санхүүгийн салбарт JP Morgan, Goldman Sachs, Morgan Stanley, Citi зэрэг банк, санхүүгийн байгууллагууд харилцан ялгаатай AI tool-ийг хөгжүүлэн арилжаандаа ашиглаж буйг дурдлаа. Энэ илтгэлийг энэ линкээр бүртгүүлэн, имэйлээр бүрэн эхээр нь хүлээн авах боломжтой.