Архангай аймгийн 100 жилийн ойд зориулан сарын хугацаанд зохион байгуулах урлаг, соёл, аялал жуулчлалын цогц эвент үйл ажиллагааны талаар өнөөдөр мэдээллээ.

Төслийн зөвлөх багийн гишүүн Э.Цолмонбаяр "Архангай аймагт аялал жуулчлалыг хөгжүүлэх зорилгоор “Аро Комплекс” цогцолбор байгуулж эхэлсэн. Одоогоор тохижилтын ажил явагдаж байна. Архангай аймгийн 100 жилийн ойн хүрээнд долоодугаар сарын 1-нээс наймдугаар сарын 1-нийг дуустал "Аяллаа Архангайгаас" арга хэмжээ болно. Аялал Архангай аймгаас эхэлдэг учир дотоодын аялал жуулчлалыг хөгжүүлэх үүднээс уг арга хэмжээг зохион байгуулж байна.

Өдөр бүр үзүүштэй хөтөлбөрүүдтэй. Үүнд  

• Явуулын цирк болон Архангайн бизнес эрхлэгчтэй хамтран 31 төрлийн хоолны асруудыг байрлуулна
• Кино театруудад цацагдаж буй шилдэг кинонуудыг толилуулна
• Арт үзэсгэлэн, 20 гаруй хүүхдийн тоглоомтой 
• “Аялгуу аялахуй” нийтийн дууны супер оддын тоглолт
• Шилдэг залуу рок поп хамтлагууд оролцсон амьд хөгжмийн тоглолт болно.  

Архангай аймгийн Засаг даргын нэрэмжит "Мөнгөн цом" бөхийн барилдаан эхэлсэн. Шигшээ барилдаанаас шалгарсан бөхчүүд "Аро комплекс"-т барилдах болно. Архангай аймагт аялангаа үйл ажиллагаанд идэвхтэй оролцохыг иргэддээ уриалж байна. Ирэх сарын 1-нд уг цогцолборын нээлт болно" гэв.  

Мөн долоодугаар сарын 22-нд “Архангайн мастер кросс” тэмцээн болох аж. Уралдаан болох үеэр байгаль орчноо сүйтгэхгүйн үүднээс өмнө нь хог хаядаг байсан талбайг засжээ.

Түүнчлэн “Voice of Mongolia”  шоунаас төрөн гарсан дуучид болон "Люмино" хамтлаг бүрэн хэмжээний шоу тоглолт үзүүлнэ. Долоо хоног бүр өөр төрлийн шоу тоглолтууд болно хэмээн мэдээллээ.  

Цогцолборын 12 цэгт 56 ширхэг байгальд ээлтэй ариун цэврийн байгууламж тохижуулж, хоёр мянга гаруй автомашины зогсоолтой аж. "Аро комплекс" нь 10 га газарт байрлаж байгаа учир 20 мянган хүний багтаамжтай байхаар төлөвлөжээ.