Нийгмийн сүлжээнд сурагчдыг "Тамгагүй төр" жүжиг үзүүлэх нэрээр мөнгө авч байна гэх мэдээлэл цацагдсан. 

Тодруулбал, нэгэн сургуулийн 8-12 дугаар ангийн сурагчдыг уг жүжгийг үзүүлэхээр зохион байгуулж, нэг хүүхдээс 20 мянган төгрөгийн төлбөр авч байна гэх агуулгатай чат олон нийтийн сүлжээнд нийтлэгдээд байв. 

Энэ талаар тодруулахад Хан-Уул дүүргийн Боловсролын хэлтсийн дарга Б.Лхагвадэмбэрэл дараах тайлбарыг өглөө.

Тэрбээр “Манай хэлтсээс сургуулиудад сурагчдыг жүжиг үзүүлэх талаар ямар нэгэн нэгдсэн зохион байгуулалт хийгээгүй. Харин Хан-Уул дүүргийн 32 дугаар сургуулийн багш, сурагчдын оролцоотойгоор жүжгийн зохиолч, агсан Б.Лхагвасүрэнгийн гэр бүлийнхний зөвшөөрөлтэйгөөр "Тамгагүй төр" жүжгийг өөрсдөө бэлтгэн тайзнаа тавьсан байна. Нээлтийн тоглолтоо Хүүхдийн ордонд хийсэн гэсэн мэдээллийг өнөөдөр сонслоо. 

Үүний дараа тухайн сургууль 6-12 дугаар ангийн сурагчдадаа үзүүлэхээр төлөвлөсөн бөгөөд мөн 163, 161 дүгээр сургуулийн ахлах ангийн сурагчдыг урьж үзүүлэхээр ярьсан байна. Энэ нь тухайн сургуулийн дотоод үйл ажиллагаа бөгөөд дүүргийн боловсролын хэлтэст урьдчилан мэдэгдээгүй байсан.

Өөрөөр хэлбэл бид ч гэсэн та бүхний адил нийгмийн сүлжээнд нийтлэгдсэн мэдээллээс л олж мэдлээ. Тиймээс бид хүүхдүүдийг өөр сургуулиас авчирч нэгдсэн зохион байгуулалтаар үзүүлэх, унаа тээврээр зөөх зэрэг асуудлыг зогсоох чиглэл өгөөд байна.

Арванхоёрдугаар ангийн хичээлийн агуулгад энэ жүжиг ордог учраас тухайн сургуулийн сурагчид үзсэн байж болно. Харин бусад сургуулийн хүүхдүүдийг заавал авчирч үзүүлэх шаардлагагүй гэж үзсэн. 

Мөн сурагчдаас төлбөр авсан гэх мэдээлэлтэй холбоотойгоор цаашид ийм байдлаар зохион байгуулахыг зогсоож, мөнгөтэй холбоотойгоор үүссэн aсуудлыг шийдвэрлэх чиглэл өгсөн. Зарим сурагчид үзэхээр очихдоо автобусны зардалд ойролцоогоор 7500 төгрөг гарсан гэсэн мэдээлэл байна" гэв.