Өнгөрсөн баасан гарагт АНУ-ын F-15 сөнөөгч онгоцыг Ираны талаас буудан унагаж, тус онгоцны нисгэгч сураггүй болоод байсан. 

АНУ болон Ираны талаас нисгэгчийг эрэн хайх ажиллагааг эхлүүлсэн бөгөөд өчигдөр буюу ням гарагт нисгэгчийг эсэн мэнд олсон тухай мэдээллээ. 

АНУ-ын хэвлэлүүдийн мэдээлснээр аврах ажиллагаанд тусгай хүчнийхэн, дайны онгоц, нисдэг тэрэг болон тагнуулын төв газар оролцсон гэв. 

Ням гарагт ерөнхийлөгч Трамп "Бид хүнд шархадсан ч маш зоригтой офицерийг Ираны уулсын дундаас оллоо" хэмээн цахим сүлжээнд нийтэлсэн юм. 

Энэ үйл явдал нь сүүлийн 20 гаруй жилийн хугацаанд АНУ-ын сөнөөгч онгоцыг дайсны тал анх удаа унагаж буй тохиолдол болсон аж. 

Тус онгоцонд хоёр нисгэгч байсан бөгөөд онгоц буудуулахад тэд шүхрээр бууж амжсан. Улмаар нэгийг нь тухайн өдрөө аварсан ч хоёр дахь гишүүн нь сураггүй болоод байв. 

Ираны талаас тус нисгэгчийг амьдаар нь олвол 66 мянган ам.долларын шагнал амлахаа мэдэгдсэн. 

Тус нисгэгч өөрийгөө хамгаалах ганц гар буутай байсан гэж АНУ-ын албаныхан мэдээлжээ. 

Тэрбээр ийм нөхцөлд ямар үйлдэл хийх вэ гэдэгт бэлтгэгдсэн байдаг бөгөөд үүнд дохионы төхөөрөмжөө асаах, өндөрлөг газарт хүрэх, нуугдах, холбоо тогтоох зэрэг багтдаг аж. 

АНУ-ын хэвлэлүүдийн мэдээлснээр нисгэгч уулын ан цавд нуугдаж, Ираны талд баригдахаас болгоомжлон дохиогоо хязгаартайгаар ашигласан гэв. 

Улмаар тагнуулын төв газраас түүний байршлыг илрүүлж, Пентагонд мэдээлсэн нь нисгэгчийг аврахад чухал үүрэг гүйцэтгэсэн байна.

Түүнчлэн тагнуулын газар Ираны талыг төөрөгдүүлэхийн тулд хоёр дахь нисгэгчийг олсон хэмээн худал мэдээлэл Иранд түгээжээ.

Трампын хэлж буйгаар АНУ цэргээ аврахын тулд "Дэлхий дээрх хамгийн хүчирхэг зэвсгээр зэвсэглэсэн олон арван нисэх онгоц" илгээсэн гэнэ. 

Шархадсан нисгэгчийг аварч, Кувейтэд хүргэн эмчилж байгаа аж. 

Эх сурвалж: ВВС