Тулгар төрийн 2234 жил, Их Монгол Улсын 819 жил, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ой, Үндэсний их баяр наадмыг тохиолдуулан Монгол Улсын Ерөнхийлөгч У.Хүрэлсүх төрийн дээд цол, одон, медаль гардууллаа.

Тэдний нэг нь Монголын сагсан бөмбөгийн салбарын эрхэм тамирчин Тунгалагийн Санчир Монгол Улсын Гавьяат тамирчин боллоо.

Тэрээр "Энгэрээ мялаах үедээ хамгийн түрүүнд тэнгэрт дэвшсэн ээжийгээ л бодлоо. Ээж минь байсан бол надаас илүү баярлах байсан байх. Манай удамд Далай даян, дархан аварга Д.Дамдин гэж хүн байсан. Энэ мундаг эрхмийн дараагийн удам болж яваадаа баяртай байдаг. 

Б.Билгүүн бид хоёр хүүхэд байхаасаа л нэг дүүрэгт сагс тоглож, өссөн. Олон жил нөхөрлөж яваа найзууд. Найз минь оны дараахан гавьяат болсонд нь маш их баярласан. Мөн нэр нь дурдагдаагүй шигшээ багийн олон тамирчид бий.

Сагсан бөмбөг бол багийн спорт. Олон хүн ард нь ажилладаг. Тэр хүмүүсийн хөдөлмөр шүү гэж бас хэлмээр байна. Мөн спортод хөрөнгө оруулдаг бүх хүмүүстээ талархлаа илэрхийлье" гэв.

МУГТ Б.Билгүүн "Өнөөдөр Т.Санчир найз минь Монгол Улсын Гавьяат тамирчин боллоо. 

Миний хувьд өмнө нь гавьяат авахдаа "Санчир найзтайгаа энэ шагналыг хамтдаа хүртсэн бол гэж их бодогдсон. Гэхдээ тэр мөч удахгүй байх" гэж хэлж байсан. Өнөөдөр биеллээ олж байгаад баяртай байна" хэмээв.

Тэрбээр 2007 оноос хойш Үндэсний  Дээд лигт тоглож байна. Энэ хугацаанд:

• Дээд лигийн дөрвөн удаагийн аварга
• 21 аймгийн лигийн аварга
• 16 удаагийн бүх одод, таван удаагийн лигийн тэргүүн тоглогч
• 2021 онд бүх оддын тоглолтын шилдэг тоглогч болж байв.