Засгийн газар өнөөдөр /2025.07.07/ ээлжит бусаар хуралдаж, гарсан шийдвэрийн талаар Эрүүл мэндийн сайд Ж.Чинбүрэн мэдээллээ. 

" ХАВДРЫН ТӨВ ХОЙД БҮСЭД НЭЭГДЭНЭ"

Тэрээр " Сайхан мэдээгээр эхлүүлье. Эрүүл мэндийн салбарт хавдрын тусламж, үйлчилгээг орон нутагт төвлөрлийг сааруулах чиглэлд Засгийн газрын шийдвэр гарсан.

Үүний дагуу Эрдэнэт үйлдвэрийн харьяа "Мэдипас" эмнэлгийг орон нутаг дахь хавдрын мэргэжлийн эмнэлэг болгох шийдвэр гарсан.

Үүнтэй холбоотой төрийн өмчийн бодлого зохицуулалтын газраас хөдлөх, үл хөдлөх хөрөнгө болон бусад зардлыг эрүүл мэндийн яамд хүлээлгэн өгөх комисс байгуулагдан ажиллаж байна.

Наймдугаар сар гэхэд Монгол Улсын хэмжээнд хойд бүсийн хавдрын төв нээлтээ хийнэ. Ингэснээр хавдрын тусламж үйлчилгээг мэргэжлийн багаар,  хавдар судлалын  салбар  эмнэлэг Эрдэнэт хотод нээгдэж буй юм.

230 МЯНГАН ХҮҮХЭД НӨХӨН ДАРХЛААЖУУЛАЛТАД ХАМРАГДСАН

Өнгөрсөн зургаадугаар сарын 23-нд Улсын онцгой комисс хуралдаж, эрүүл мэндийн салбар эрчимжүүлсэн бэлэн байдалд орсон. Ингэснээр 10 сар-15 нас хүртэлх 230 мянган хүүхэд нөхөн дархлаажуулалтад хамрагдсан байна.

Үүнээс Баянхонгор аймаг хамгийн өндөр нөхөн дархлаажуулалттай буюу 68 хувьд хүрсэн байна. Хөвсгөл, Архангай аймаг 62 хувьтай.

Нийслэлийн хувьд Багахангай 60 хувь, Сонгинохайрхан, Багануур, Хан-Уул дүүрэг тус тус 53 хувьд хүрсэн.

Вакцинд хамрагдагсад нэмэгдэж, эмнэлэгт хандах иргэдийн тоо 5 дахин буурсан. Мөн эрчимт эмчилгээнд байсан найман хүүхдийн долоо нь хэвийн байдалд орсон.

Эндэгдэл долоо хүүхэд байсан бол дахиж нэмэгдээгүй. Дархлаажуулалт ямар чухал болохыг эдгээр статистик харуулж байна.

Хэрэв хүүхдээ дархлаажуулалтын вакцинжуулалтад хамраагдаагүй бол заавал нөхөн вакцинжуулалтад хамруулах хэрэгтэй. Орон нутагт явж байсан ч  хийлгэх боломжтой.

Эрүүл мэндийн салбарынхан 22:00 цаг хүртэл ажиллаж байна. Иймд тэдний хүч хөдөлмөр, цаг хугацааг хүндлээрэй" гэв