Нийслэлд анхны орон сууцыг 70 жилийн өмнө барихад орон сууц, нийтийн аж ахуйн газрыг хамт байгуулсан түүхтэй. 

Эмч, онцгойгийн ажилтнууд 24 цагаар ажилладаг шиг орон сууц, нийтийн аж ахуйн засварчид мөн байнгын бэлэн байдалд байдаг. ОСНААУГ-ын Хэрэглэгчийн үйлчилгээний хэлтсийн дарга Б.Шинэхүүтэй ажлынх нь онцлог, энэ салбарт тулгамдсан асуудлуудын талаар ярилцав. Түүний ярилцлагын онцлох ишлэлүүд: 

• Нийслэлийн өрхүүд сард дунджаар 6000-8000 литр ус хэрэглэж байна. Нэг цистерн 5000 литр усны багтаамжтай гэхээр бид их ус хэрэглэдэг. Өрхүүдийн усны нэг сарын дундаж төлбөр 18-19 мянган төгрөг байна.  
• Иргэдийн төлсөн усны төлбөрөөр л бид халуун, хүйтэн усыг олгодог.  
• Метр куб гэхээр хүмүүс бага гэж боддог. Нэг метр куб ус гэдэг нь 1000 литр ус юм.  
• Хуучны барилгууд зай талбайгүй, цагирган системтэй гэх мэт шалтгааны улмаас тоолуургүй өрх олон. Нэг айлаас нөгөө айл руу дамждаг системтэй тул нэг нь тоолуур тавьчихвал нөгөө айл мөн адил төлбөр төлөх болно. Иймд тоолуур суурилуулах боломжгүй. Эдгээр өрх задгайгаар төлбөрөө төлдөг.  
• Байрны зарим эзэмшигч бидэнтэй гэрээ хийхдээ хоёр ам бүлтэй гэж бүртгүүлдэг. Гэвч үүнээс илүү олуулаа амьдардаг айлуудад түрээслэх тохиолдол бий.  Орон сууцанд амьдардаг нийт өрхийн 13 хувь нь усны тоолуургүй байна.                

• ОСНААУГ нь дараа төлбөрт байгууллага юм. Хэрэглэгч усаа хэрэглэсний дараа төлбөрөө төлдөг. Төлбөрөө цагт нь төлөөгүй гээд бид усыг нь таслах боломжгүй. Учир нь усны шугам сүлжээ дундын өмчлөл юм.  
• Хоёр сар болон түүнээс дээш хугацаагаар усны төлбөрөө төлөөгүй бол бид шүүхэд ханддаг. Энэ нь цаг их авсан, удаашралтай ажил байдаг.  
• Усыг таны гэрт 24 цагийн турш хүргэхийн тулд маш урт шугам сүлжээ, тоног төхөөрөмжүүд, хүн хүч шаарддаг. Есөн давхар руу ус хүргэхийн тулд шахуурга ажиллуулж, цахилгааны зардал мөн төлдөг. Халуун, хүйтэн усны градусыг хэмжинэ, хянана. Энэ мэтээр олон зардал гардаг ч усны үнэ өртгөө ч нөхдөггүй.                
• УСУГ усыг олборлосны дараа манай байгууллага иргэдэд усыг түгээдэг. Зарим хэрэглэгч (ААН, өрх) усны төлбөрөө төлөөгүй байсан ч бид ханган нийлүүлэгч болох УСУГ-т усны төлбөрийг нь төлдөг. Иймд хэрэглэгчид үүргээ ухамсарлан, төлбөрөө цагт нь төлж байгаарай.   
• Нэг хайрцаг тамхи 4000 төгрөгийн үнэтэй. Зарим хүн өдөрт л нэг хайрцгийг татдаг. Гэтэл 4000 төгрөгөөр бид 3700 литр ус хэрэглэдэг. Нэг литр усны үйлчилгээний үнэ манайд маш хямд, нэг литр нь 1 төгрөг 34 мөнгө байна. 
• Усны үйлчилгээний үнийг нэмэх шаардлагатай.          
• Усны төлбөрөө цагт нь төлөхгүй бол бид урсгал, их засваруудыг төлөвлөсөн хугацаандаа хийж чадахгүйд хүрдэг. Сар бүрийн 20-ны дотор төлбөрөө төлж хэвшээрэй. Нийт хэрэглэгчдийн 60 орчим хувь нь цагтаа төлдөг. Үлдсэн нь залгуулна. Байцаагчид өдөр шөнөгүй явж байж усны борлуулалтын орлогыг цуглуулдаг.  
• Төлбөрөө цагт нь төлдөг иргэд төлдөггүй иргэдийн улмаас хохирох эрсдэл бий. Бид 1500 км урт шугам сүлжээг хариуцан ажилладаг. Энэ нь  эндээс Ховд хүртэлх зай юм. Энэ шугам сүлжээний 60 хувь нь өндөр насжилттай буюу хуучирсан. Хэзээ ч хагарч мэднэ. Гадна шугам гэмтвэл гэмтлээс хамаарч олон цагаар ус хязгаарладаг. 
• Европын орнуудад ус нь үнэтэй тул хувцсаа гэртээ угаадаггүй. Нийтийн угаалгын газруудад үйлчлүүлдэг. Харин бид 00-доо хүртэл цэвэр ус ашиглаж байна. 
• УСУГ-ын олборлосон нийт усны 7-8 хувийг бид хэрэглэлгүй урсгадаг. Шугам сүлжээ хуучирсан, зарим айлын суултуур эвдэрсэн, угаалтуурын ус нь дусалж байдаг гэх мэт олон шалтгаанаар усаа алддаг гэсэн юм. Үүнийг усны алдагдал гэдэг. Усны дусал бүр үнэ цэнтэй. 
• Танай  гэр, ажлын холигч, суултуур эвдэрсэн бол тэр даруй засуулж байгаарай.  
• ОСНААУГ, СӨХ нь өөр чиг үүрэгтэй, тусдаа байгууллагууд юм.  
• Бид хэрэглэгч бүрд 8 оронтой, давтагдашгүй код олгож эхэлсэн. Biller.ub.kontor.mn цахим хуудсаар нэвтэрч, төлбөрөө төлөх боломжтой. Та нэвтэрсний дараа кодоо өөрчилж болно. Өмнөх саруудын хэрэглээ, тоолуурын заалтуудаа хянаж болно. Мэйл хаягаа бүртгүүлэн, НӨАТ-ын баримтаа ч авах боломжтой. 
• Дулааны цахилгаан станцуудаас халуун усыг шууд танай гэрт хүргэдэг мэтээр иргэд боддог. Тийм биш юм. Яагаад ус халаасны төлбөр авав гэж олон хүн асуудаг.  
• Тостой хоол, үс, ноос гэх мэтийг суултуур руу хийж, урсган, худгийг бөглөдөг. Худаг бөглөрөхөөрөө хальж, орчноо бохирдуулдаг. Энэ бүхнийг манай засварчид бохирын худаг руу орж засдаг. Суултуур хогийн сав биш.  
• Бид иргэдийн гомдлыг дөрөв хоногт шийдэж байна.