Цэцэрлэгийн болон ерөнхий боловсролын сургуулийн багшийн ажлын гүйцэтгэлийн үр дүнг үнэлэх үнэлгээний ажлыг Боловсролын үнэлгээний төвөөс дөрөв дэх жилдээ зохион байгуулж байна.

Энэ жилийн багшийн ажлын гүйцэтгэлийн үнэлгээ нь:

• Суурь, бүрэн дунд боловсролын сурагчид цахимаар шалгалт өгөх;
• Мэргэжлийн байгууллага, БШУГ, БХ, БШУГ, сургуулийн үнэлгээний багийн оролцоог нэмэгдүүлэх;
• Үнэлгээний найдвартай байдлыг хангах хөндлөнгийн хяналтыг сайжруулах; зэрэг онцлогтой явагдаж байна.

Шалгалтыг цахимаар явуулж буйтай холбоотой системд ачаалал бага зэрэг үүсэж буй аж. Тухайлбал математик болон англи хэлний хичээлийн цахим шалгалтын үед ачаалал хамгийн өндөр, нэг агшинд 20 мянга орчим шалгуулагч ханджээ. Энэхүү ачааллаас үүдэлтэй математикийн 11-р ангийн шалгалт хугацаанаасаа хоцорч эхэлж мөн дундаа ачаалсан байна. Ачааллын үед математикийн хичээлийн шалгуулагч системд 95% нэвтэрч шалгалт өгсөн боловч гацалтаас шалтгаалж хэт богино хугацаанд даалгавар гүйцэтгэсэн тохиолдол системд бүртгэгджээ. Шалгуулагчдаас дахин шалгалт зохион байгуулах асуудлыг авч хэлэлцэж байна.

Боловсролын үнэлгээний төвөөс системийн болон сүлжээнд ачаалал ихсэж буйтай холбоотойгоор техникийн өргөтгөлийг 3 дахин нэмэгдүүлэх ажлыг хийж байна.

Журмын дагуу:

• Дөрөвдүгээр сарын 28-аас тавдугаар сурын 03-ны өдрүүдэд: СӨБ-ийн багшийн ажлын гүйцэтгэлийн үнэлгээ
• Тавдугаар сарын 12- 23-ны хооронд: ЕБС-ийн багшийн ажлын гүйцэтгэл үр дүнг үнэлэх  үнэлгээг  улс орон даяар зохион байгуулах юм.

Энэхүү үнэлгээний зорилго нь багшийн ажлын гүйцэтгэл, сургалтын үр дүнг үнэлж, багшийн мэргэжлийн хөгжлийн хэрэгцээг тодорхойлох, өөрийн болон хөндлөнгийн үнэлгээний соёл төлөвшүүлэх, сургалт үйл ажиллагааны чанар, үр дүнг сайжруулахад чиглэдэг.

Улсын хэмжээнд төрийн болон орон нутгийн өмчийн 700 сургуулийн 29689 багшийн 854507 сурагч энэхүү үнэлгээнд хамрагдана.

Эх сурвалж: Боловсролын үнэлгээний төв