2030 ОН ХҮРТЭЛ 15.5 САЯ ГАРУЙ МОДНЫ ТАРЬЦ, СУУЛГАЦ НИЙЛҮҮЛЭХ ЗОРИЛГОТОЙ

Анх 1975 онд ашиглалтад орсон, Булган аймгийн Хангал сумын Хялганат тосгоны татан буугдсан мод бэлтгэлийн үйлдвэрийн объектыг шинэчлэн засварлаж Ой хээрийн түймрээс урьдчилан сэргийлэх сургалт, судалгаа, туршилт үйлдвэрийн төвийг байгуулжээ.

Тодруулбал, 2023 оны Засгийн газрын шийдвэрээр, Ой хээрийн түймрээс урьдчилан сэргийлэх сургалт, судалгаа, туршилт үйлдвэрийн төвийг Орхон аймгийн Онцгой байдлын газар, БОАЖЯ, Ойн газартай хамтран байгуулжээ.

Тус байгууллагын зорилго нь мод үржүүлэх, байгалийн доройтолд өртсөн газарт судалгаа шинжилгээ хийх, ногоон байгууламжийг нэмэгдүүлэх юм. Мөн Онцгой байдлын байгууллагын хэмжээнд  тарьж байгаа мод, бут, жимс жимсгэнэ, цэцэрлэгжүүлэлтийн  нэгдсэн мэдээллийн сан бүрдүүлэх, орон нутгуудын ажлын явцыг хянах, мэргэжил арга зүйн зөвлөгөө өгөх, шаардлагатай тохиолдолд газар дээр нь очиж мэргэжлийн дэмжлэг үзүүлэх,  нэгдсэн удирдлага зохион байгуулалтын арга хэмжээ авах зорилготой аж.  

Зорилго:

• Ган болон хүйтэнд тэсвэртэй үр тариа, ургамлын тарьц, суулгацын шинэ сорт гаргах,
• Иргэд гамшгаас хамгаалах болон экологийн боловсрол олгох, хүний нөөцийг сургаж бэлтгэх, модны тарьц суулгацын нөөцийг бүрдүүлэх,
• Эхний жилд 10 гаруй нэр төрлийн 2 сая гаруй мод, бут сөөг тарьж үрслүүлэх, цаашдаа жилд 1.9 сая тарьц, суулгац нийлүүлэх ба 2030 он хүртэл 15.5 сая гаруй модны тарьц, суулгац нийлүүлэх юм.

Ойн төлөв байдлыг сайжруулах, нөхөн сэргээх нөхцөлийг хангах цэвэрлэгээ хийснээр ойн санг хамгаалах, шатсан ойд хортон шавж үржихээс сэргийлж эрүүлжүүлэх, төлөв байдлыг сайжруулах, ойн түймрийн тоог хоёр дахин, түймэрт өртөх талбайн хэмжээг 3-4 дахин бууруулах боломжийг бүрдүүлнэ хэмээн Орхон аймгийн Онцгой байдлын газрын дарга Г.Ганбаатар хэлсэн юм.

Гал түймэр унтраах аврах 50 дугаар ангийн одоогийн барилга нь 1960 онд баригдсан модон бүтээцтэй, үйл ажиллагаа явуулах боломжгүй талаар мэргэжлийн хяналтын байцаагчийн дүгнэлт гарсан тул тус барилга байгууламжид шилжин байршсанаар 6.3 тэрбум төгрөг хэмнэсэн гэв.

Энэхүү байгууллага нь дараах орон тооны 60 гаруй мэргэжилтэн, албан хаагчтай ажиллах юм.

Байгууламжийн дэд бүтэц, гэрэлтүүлэг, усан хангамж, ажлын байранд шаардлагатай зүйлс бүрэн хангагджээ. Энэ оны дөрөвдүгээр сараас үйл ажиллагааг идэвхжүүлж эхэлсэн ба хүний нөөцийн 50 гаруй хувийг бүрдүүлээд байгаа аж.

Энэхүү төвийг байгуулснаар тухайн бүс нутагт ойн хээрийн түймрээс урьдчилан сэргийлэх үйл ажиллагааг эрчимжүүлж, байгаль экологид учирсан хохирлыг бууруулах, “Тэрбум мод” үндэсний хөдөлгөөнд Онцгой байдлын байгууллага тэргүүлэх чиглэлд ажиллах нөхцөл боломжийг дээшлүүлэхэд чиглэж байна.

Гэрэл зургийг Г.Өнөболд