Pearson English англи хэлний сургалтын хөтөлбөр болон Pearson BTEC олон улсын IT хөтөлбөрийн нээлт өнөөдөр болж байна. Pearson English хөтөлбөр нь ЕБС-ийн 5-6 ангид хэрэгжиж эхэлсэн бол Pearson BTEC олон улсын IT хөтөлбөр нь политехник коллежуудад хэрэгжиж байна.

Үйл ажиллагааны шууд дамжуулалтыг дараах видеоноос хүлээн авна уу.

Видеог тоглуулах боломжгүй байвал та ЭНД дарна уу.

"ТУРШИЛТААР 38 СУРГУУЛИЙГ ХАМРУУЛСАН БА  ЦААШИД ЕРӨНХИЙ БОЛОВСРОЛЫН 688 СУРГУУЛЬД ХӨТӨЛБӨРИЙГ ХЭРЭГЖҮҮЛНЭ"

БШУ-ны сайд Л.Энх-Амгалан үйл ажиллагааг нээж хэлсэн үгэндээ "2023-2025 онд бүх нийтийн англи хэлийг дэмжихээр Pearson English хөтөлбөрийг хэрэгжүүлж эхлээд байна.  Ерөнхий боловсрол болон мэргэжлийн боловсролд энэхүү хөтөлбөрийг хэрэгжүүлнэ. Өнгөрсөн хугацаанд 38 сургуульд туршилтаар нэвтрүүлсэн ба 5-9 дүгээр ангийн сурагчдын англи хэлний мэдлэгийн гарааны үнэлгээ 29,3 хувь байсан бол 47,4 хувь болж өссөн. Тэдний сонсох, ярих, бичих, унших чадвар нэмэгдэж, идэвх мэрийлттэй болохоос гадна багш нарын арга зүй, чадвар сайжирсан үр дүнтэй байна. Ийнхүү дээрх туршсан аргачлалыг 688 сургуульд хэрэгжүүлэхээр болж байна. Pearson English хөтөлбөр нь ЕБС-ийн 5-6 ангид хэрэгжиж эхэлсэн бол Pearson BTEC олон улсын IT хөтөлбөр нь политехник коллежуудад хэрэгжиж байна" гэлээ.

Pearson компани,  Global Scale of English-ийн захирал Майк Майор:

- Мэдээж хувь хүний ур чадвар, амьдрах ур чадвар чухал. Тэр дундаа ирээдүйд шүүмжлэлтэй сэтгэлгээ, бүтээлч байдал, хамтын ажиллагаа, харилцаа нь чухал ур чадварт үнэлэгдэх болно.

Томоохон судалгаанууд англи хэл дээр,  дэлхийн эдийн засаг англи хэлээр хүрдэг. Англи хэлд дуртай эсэхээс үл хамааран, энэ нь бизнесийн үндсэн хэл юм.  Монголчууд англи хэлийг өргөн хэрэглэдэггүй ч жишээ нь ирээдүйд Тайланд эсвэл Польш бизнесмэнтэй хамтрахад англи хэлээр л ярих шаардлага гарна. Англи хэл бол дижитал хэрэглээтэй адилхан ирээдүйд шаардлагатай ур чадварын нэг болсон ба энэ нь яг технологийн салбартай төстэй юм.

Хөтөлбөрийн шинэчлэлт хийх болсон шалтгаан

• Англи хэл
  Ажлын байран дээрх дунд түвшний ажилтнуудаас шаардах англи хэлний түвшин 80 хувь болсон. 20-30 жилийн өмнө зөвхөн удирдах түвшний ажилтнаас шаарддаг байсан бол өдгөө бараг бүх ажилтнаас шаардаж байна.
• Ирээдүйн ур чадвар
  Байгууллагуудын 69 хувь нь ажилтны хатуу ур чадвараас илүү зөөлөн ур чадварыг чухалчлах болсон
• Дижитал бичиг үсгийн мэдлэг
  Цар тахлын үед цахим ур чадварын үндсэн хэрэглээ 72 хувиар өссөн

“Pearson English” англи хэлний сургалтын цогц хөтөлбөрийг өнгөрсөн зургаан сарын хугацаанд туршилтаар 38 сургуульд хэрэгжүүлсэн. Туршилтаас өмнө сурагчдаас авсан гарааны үнэлгээгээр англи хэлний түвшин 29 хувьтай байсан бол хавар төгсөхөд 47 хувьд хүрч 20 орчим хувийн ахиц гарсан юм.

Тиймээс энэ хичээлийн жилд төрийн өмчийн бүх ерөнхий боловсролын сургуулийн V-VI ангийн 140 орчим мянган сурагчийг энэ хөтөлбөрт хамруулахаар шийдвэрлээд байна. Цаашид 2024-2025 оны хичээлийн жилд III - IV анги, VII-VIII ангид, 2025 – 2026 онд үндэсний хэмжээнд “Pearson English” хөтөлбөрийг хэрэгжүүлнэ.

Pearson нь орчин үеийн дэвшилтэт технологид суурилсан хөтөлбөрийн агуулга, хэрэглэгдэхүүн, үнэлгээ, аргачлал, багшийн хөгжил бүхий сургалтын цогц платформ юм. Тус хөтөлбөр нь дижитал платформ болон танхимын сургалтын хосолсон хэлбэрийг сургалтдаа ашигладаг. Агуулгыг олон улсын жишгийн дагуу боловсруулсан, багшийн хөгжил болон заах арга зүйг хөгжүүлэх, ажлын ачааллыг бууруулах, сурагчийн сурлагын ахицыг үнэлэх боловсронгуй аргачлалтай гэдгээрээ онцлог.

Pearson байгууллагатай хамтран төрийн өмчит Ерөнхий боловсролын сургуулийн багш нарын заах аргазүйд дэмжлэг үзүүлэх, үндэсний сургагч багш бэлдэх ажлын хүрээнд Англи хэлний багш нараас олон улсын түвшин тогтоох шалгалт авчээ. Цаашид багш нарын англи хэлний мэдлэг, ур чадвар, олон улсын заах аргазүйн сургалтуудыг үе шаттай зохион байгуулах юм байна. Өнөөдрийн байдлаар 120 үндэсний сургагч багш бэлдэж, 1600 гаруй багш олон улсын англи хэлний хөтөлбөрийн заах аргазүйн сургалтад хамрагдаад байна.

Политехник коллежуудад олон улсын мэдээллийн технологийн хөтөлбөр хэрэгжиж эхэллээ

Монгол Улс мэдээллийн технологийг эдийн засгийн голлох салбарын нэгээр нэрлээд зогсохгүй “Цахим Үндэстэн” болох уриалгыг дэвшүүлээд буй. Энэ хүрээнд харилцаа холбоо, мэдээллийн технологийн салбарын хүний нөөцийг бэлдэх, Мэргэжлийн болон техникийн боловсролын байгууллагыг шинэ шатанд гаргах, олон улсын хөтөлбөр хэрэгжүүлэх замаар сургалтын чанар, суралцагч төгсөгчийн мэргэшлийн ур чадварыг дээшлүүлэхээр зорьж байна.

Ингээд Pearson байгууллагын мэргэжлийн боловсролын олон улсын мэдээллийн технологийн хөтөлбөрийг (Pearson BTEC International Level 3) энэ хичээлийн жилээс хэрэгжүүлж эхэллээ.

Дэлхийн 70 гаруй улс орны Засгийн газар, ажлын олгогч, мэргэжлийн холбоод, 300 гаруй их дээд сургуулиар хүлээн зөвшөөрөгдсөн тус хөтөлбөрийг төрийн өмчит таван политехник, коллеж хэрэгжүүлэх эрхээ аваад байгаа билээ.

Мэргэжлийн боловсрол сургалтын салбарт мэдээллийг технологийн ашиглалтыг чанарын болон ур чадварын өндөр түвшинд хүргэх, сургалтын агуулга хөтөлбөр, сургалтын орчныг шинэчлэх, багшлах боловсон хүчнийг чадавхжуулах, ирээдүйд шаардагдах мэдээллийн технологийн салбарын эрэлтэд мэдрэмж бүхий мэргэжлийн боловсрол, сургалтын салбарыг бий болгоход Pearson BTEC олон улсын мэдээллийн технологийн хөтөлбөр чухал хувь нэмрээ оруулна гэдэгт итгэлтэй байна.

Энэхүү хөтөлбөрийн төгсөгчид суралцагч Үндэсний болон олон улсын хос дипломтой төгсөх, олон улсын хөдөлмөрийн зах зээл шууд гаран ажиллах, 300 гаруй их дээд сургуульд элсэн суралцах, боломж нь бүрэн нээгдэх юм.