Ерөнхий аудиторын албан тушаалд нэр дэвшигчийн сонсгол эхэллээ. Барилга хот байгуулалтын яамны төрийн нарийн бичгийн дарга асан С.Магнайсүрэн нэр дэвшсэн юм. 

Тэрээр УИХ-ын гишүүдийн асуултад хариулж байна. Тэрээр иргэдийн төрийн байгууллагад итгэх итгэл ихээхэн суларсан ээ үед иргэдийн өргөдөл, гомдол, саналд шуурхай хариу өгч ажиллана. Таван минутад шийдэх асуудлыг төрийн албан хаагчид удаашруулдаг, иргэнийг олон дахин нааш цааш явуулдаг нь буруу. Өргөдөлд хариу өгөх 30 хоногийн хугацааг хүлээх шаардлагагүй. Үүний улмаас төрийн нэр хүнд их унасан. Би үүнд ихээхэн анхаарч ажиллана гэв.   

УИХ-ын дарга Д.Амарбаясгалан бүрэн эрхийнхээ хүрээнд Үндэсний аудитын газрын даргад С.Магнайсүрэнг нэр дэвшүүлжээ. С.Магнайсүрэнгийн намтар:

• 1975.3.28-нд Говь-Алтай аймагт төрсөн

Боловсрол:

• 1993 онд Говь-Алтай аймгийн 10 жилийн 1-р сургууль
• 1997 онд МУИС-ийн ХЗДС /эрх зүйч, бакалавр/
• 1999 онд МУИС-ийн ХЗДС /эрх зүйч, магистр/

Ажилласан байдал:

• 1997-1999 онд "Улаанбаатар-Эрдэм” дээд сургуульд багш, тэнхимийн эрхлэгч,
• 1999-2000 онд УИХ-ын Тамгын газарт УИХ-ын гишүүний туслах,
• 2000-2005 онд УИХ-ын тамгын газарт зөвлөх,
• 2005-2006 онд СБД-ийн ЗДТГ-т Тамгын газрын дарга,
• 2006-2007 онд ХХААЯ-нд Сайдын зөвлөх,
• 2007-2008 онд Сангийн яаманд Газрын дарга,
• 2008-2013 онд УИХ-ын Тамгын газарт Нарийн бичгийн дарга,
• 2015 онд Хөдөлмөрийн яамны Төрийн нарийн бичгийн дарга,
• 2015 онд Барилга, хот байгуулалтын яамны Төрийн нарийн бичгийн дарга
• 2023 онд Уул уурхай, хүнд үйлдвэрийн яамны Төрийн нарийн бичгийн даргаар ажиллаж байжээ. Төрийн тэргүүн зэргийн түшмэл цол зэрэгтэй.

УИХ-ын гишүүд нэр дэвшигчээс улс төрөөс хараат бусаар ажиллахыг хүсэв. Мөн зарим гишүүн санхүүгийн мэргэжилтэй хүн ерөнхий аудитороор ажиллах нь илүү зохимжтой гэв.

Ирэх долоо хоногт УИХ-аар Аудитын тухай хуулийн төслийг хэлэлцэнэ.

Нэр дэвшигч С.Магнайсүрэн: БНХАУ-д аудитын тайланг хиймэл оюун  ухаан ашиглан хийдэг болжээ. иймд бид мөн энэ чиглэлд анхаарч,технологийг ажилдаа нэвтрүүлнэ. 

Бүх байгууллага дотоод аудитаа сайжруулах ёстой. Дотоод аудитын тухай хууль гаргах шаардлага бий. Жишээ нь Хөгжлийн банк аудитаа гаднын компаниар өндөр үнээр хийлгэж байна.  

УИХ-ын гишүүн Д.Батбаяр: Ерөнхий аудитор шүдгүй арслантай ижил байдаг. Та бүхэн хяналт шалгалт хийж, алдааг илрүүлсэн ч өнөө хүмүүс нь харин ч албан тушаал ахиад байдаг. төсвийн ерөнхийлөн хянагч нартай холбоотой олон дүгнэлтийг таны удирдах байгууллагаас гаргадаг ч хэн ч ямар ч хариуцлага хүлээдэггүй. Та нар хэзээ шүдтэй арслан болох вэ?

УИХ-ын гишүүн Ж.Баясгалан: Төрийн өмчит компаниудаас ашигтай ажилладаг нь гарын арван хуруунд багтахаар цөөн. Ашиггүй ажилладаг нь маш олон. Гэтэл гурван жил дараалан аудитын дүгнэлтээр ашиггүй ажилласан компанид огт хариуцлага тооцоогүй. Эдгээрийг цөөлмөөр байна.

Хамтарсан Засгийн газар байгуулж, төрийн албан хаагчийг бууруулна гэсэн ч улам нэмэгдэв. Үр ашиггүйгээр өнө удаан ажиллаад байгаа, төрийн өмчийн компаниудыг яаж хамгаалаад авч үлдээд байдаг юм бэ? Та эрх зүйч  хүний хувьд үүний гаргалгаа, шийдлийг олоорой. Хуулийг хэрэгжүүлэн, сайн ажиллаарай.                 

УИХ-ын гишүүн Г.Ганбаатар: Аудитын дүгнэлт их тулгуу ирдэг, уншиж судлах цаг олгодоггүй. Нийслэлд 36 км замыг 2.4 их наяд төгрөгөөр барих гэж байна. Тэгэхээр нэг км замын өртөг нь хэдэн тэрбум төгрөг байх вэ? Иймэрхүү замбараагүй байдал газар авлаа. Улсын төсөв тэлж байгаа нь сайн хэрэг боловч аудит зардлыг хэрхэн зарцуулж байгаад анхаарч ажиллаарай. 

Аудит сайн ажилласан бол ногоон автобусны хэрэг гарах байсан уу? Энэ нь аудитын байгууллага улс төрөөс ямар их хамааралтайг харуулсан. УИХ таны томилгоог эцэслэн шийднэ.          

ТББ-ын төлөөлөл Ж.Сайнзаяа: Аудиторууд хийсэн ажилдаа хариуцлага үүрдэггүй. Боловсролын зээлийн сангийн алдагдал үүний нэг жишээ. Аудиторууд бага үнийн дүнтэй баахан алдаа илрүүлээд, том дүнтэй зөрчлийг ил гаргадаггүй. Энэ нь олон жилийн дараа ил гарч, бөөн шуугиан дэгдээдэг. Гэвч аудитор алдаатай дүгнэлт гаргасан бол ямар ч хариуцлага тооцдоггүй. Үүнийг өөрчлөх хэрэгтэй.     

Монголын залуучуудын эвслийн гүйцэтгэх захирал Т.Амарзаяа: Таныг УИХ-ын дарга Д.Амарбаясгалан нэр дэвшүүлжээ. Та хоёр нэг нутгийнх юм байна. Засгийн газраас хуульд заагаагүй олон хороодыг байгууллаа. Үндэсний хорооны ажилтнуудын цалин маш өндөр. Үүнд анхаарч ажиллаарай.  
        
Нээлттэй сонсгол дуусав. Үргэлжлүүлэн Төсвийн байнгын хорооны гишүүд хаалттай хуралдан, хоёр хоногийн дотор сонсголын тайланг гаргах ёстой. Энэ тайланг УИХ-ын байнгын хороо болон чуулганы нэгдсэн хуралдаанд танилцуулах юм.