АНУ-ын ерөнхийлөгч Дональд Трамп Венесуэл улсын нутаг дэвсгэрт цохилт өгч, ерөнхийлөгч Николас Мадурог баривчилсан гэж мэдэгдлээ. 

Трамп Мадуро болон түүний гэргийг баривчилж, улсаас нь гаргасан гэж мэдэгдсэний дараа Венесуэлийн дэд ерөнхийлөгч нь Мадурогийн байршил тодорхойгүй байгааг мэдэгдээд амьд байгаа гэх баталгаа өгөхийг шаардсан байна.

Бямба гаргийн өглөө Трамп Венесуэлийн нийслэл Каракас дахь цэргийн байгууламжууд руу цохилт өгөх тушаал өгсний дагуу АНУ-ын цэргүүд Венесуэл рүү довтолжээ. 

Цохилтын улмаас хүмүүс амь үрэгдсэн тухай Венесуэлийн Засгийн газраас мэдээлсэн ч тодорхой тоо хэлээгүй аж.

Үүний өмнө Трамп Мадурог "хар тамхины улс" удирддаг мөн өнгөрсөн жилийн ерөнхийлөгчийн сонгуульд хууль бусаар ялалт байгуулсан гэж буруутгаж байсан. 
Харин Мадуро Вашингтоныг дэлхийд хамгийн томд тооцогдох Өмнөд Америкийн газрын тосны нөөцийг хяналтдаа авахыг зорьж байна хэмээсэн юм. 

Трамп анхны бүрэн эрхийнхээ хугацаанд ч Венесуэлийн ерөнхийлөгч Мадурог хар тамхины бүлэглэлтэй холбоотой, гэмт хэрэгтэн гэж үзэж байсан бөгөөд АНУ-ын хууль ёсны дагуу шүүх ёстой гэдэг байв. 

Энэ оны есдүгээр сараас эхлэн АНУ-ын талаас Карибын тэнгис болон Номхон далайгаар зорчих Венесуэлийн хөлгүүдэд цохилт өгсөн. Эдгээр хөлгийг хар тамхи тээвэрлэсэн тул цохилт өгсөн тухай Трамп мэдээлсэн. 

АНУ 1989 онд Панамд цэргийн ажиллагаа явуулж, удирдагчийг нь огцруулснаас хойш Латин Америкт өнөөдрийнх шиг шууд дайралт хийж байгаагүй юм. 

Эх сурвалж: Reuters