Аль ч улсад онцгой байдлын алба хаагчдыг хамгийн эрсдэлтэй ажил эрхэлдэгт тооцдог. Хаана ямар гамшиг, аюулт үзэгдэл тохионо, тэнд онцгой байдлын алба хаагчид ажиллана. Алба хаагчид албан үүргээ гүйцэтгэж яваад амь эрсдэх тохиолдол хаана ч цөөнгүй гарч байна.

Техник, технологийн дэвшлүүд хөгжсөөр буй энэ цагт бусад улс орнууд алба хаагчдад тулгарах эрсдэлийг бууруулах чиглэлд ямар арга хэмжээ авч ажиллаж байна вэ?

Сүүлийн үед нисгэгчгүй онгоцны хэрэглээ ихээр нэмэгдсэн. Дэлхийн 90 гаруй улсад нисгэгчгүй онгоцыг төрөл бүрийн зориулалтаар ашиглаж буй бөгөөд үүнээс 30 гаруй нь зэвсгийн зориулалтаар ашиглаж байна.
Тэгвэл нисгэгчгүй онгоцыг гал унтраах, эрэн хайх, аврах ажиллагаанд ашигласнаар алба хаагчдын аюулгүй байдлыг хангахаас гадна ажиллагааны үр дүнтэй байдлыг ч нэмэгдүүлж байгаа юм. Одоогоор АНУ, БНХАУ, Канад, Австрали, Япон зэрэг улсууд дроныг гал унтраах ажиллагаанд идэвхтэй ашиглаж буй.

Дроныг гал унтраах, дулаан мэдрэгч камер суурилуулан гал түймрийг илрүүлэх, нөхцөл байдлыг хянах, хүн эрэн хайх зэрэг ажиллагаануудад ашиглах боломжтой аж. Дрон нь өндөр давхарт гарсан галыг унтраахад үр дүнтэйгээрээ онцлог. Хэмжээ, хүчин чадлаасаа шалтгаалаад дронуудын үнэ дунджаар 6-50 мянган ам.долларын үнэтэй байна. 

Манай улсын хувьд "Өндөр барилга байгууламжид гарсан галыг унтраах 30 метр хүртэлх буюу 9 давхарт хүрэх хүчин чадалтай автомашин бий. Гэтэл сүүлийн үеийн тоон мэдээллээр Улаанбаатар хотод 10 ба түүнээс дээш давхрын 198 барилга бүртгэгдсэн.
Цаашид онцгой байдлын байгууллагаас, Монгол болон Франц улсын Засгийн газрын санхүүгийн хэлэлцээрээр дээр барилга, байгууламжид хүрч ажиллах хүчин чадалтай 18 тусгай автомашин нийлүүлэхээр ажиллаж байна" хэмээн ОБЕГ-ын дарга Г.Ариунбуян мэдээлж байсан. 

2016 онд АНУ-ын Калифорн мужийн Оакланд хотын нэгэн агуулахад гал гарсан нь тус хотын түүхэн дэх хамгийн хохиролтой гал түймэр болжээ. Энэ үеэр дулаан мэдрэгч камер суурилуулсан дрон ашиглан галын голомтыг илрүүлэх, гал унтраасны дараа барилгад хайлт хийсэн нь ихээхэн үр дүнтэй байсан гэв.
Үүнээс хойш дроны технологийг улс орнууд ашиглаж эхэлсэн бөгөөд АНУ-ын 900 гаруй онцгой байдлын албанд дроныг ямар нэг зориулалтаар ашиглаж байна.

Нисгэгчгүй онгоцноос гадна гал сөнөөгчийн амийг эрсдүүлэхгүйгээр том хэмжээний галыг унтраах үр дүнтэй аргуудын нэг бол алсаас удирдах төхөөрөмжүүд юм. Гал унтраахад үр дүнтэй тус төхөөрөмжийг Канад, Сингапур, БНХАУ зэрэг улсууд ашиглаад эхэлжээ. 

Манай улс энэ мэт сүүлийн үеийн дэвшилтэт тоног төхөөрөмж, хувцас хэрэглэлүүдийг ашиглахад хүндрэл бэрхшээлүүд учирч байгаа нь шаардлагатай хөрөнгө оруулалтыг хангалттай хийж чадахгүй байгаатай холбоотой гэдгийг Шадар сайд С.Амарсайхан хэлсэн. 

Улс орнууд онцгой байдал, гамшигтай тэмцэх салбартаа их хэмжээний мөнгө төсөвлөсөөр ирсэн бөгөөд энэ хэмжээгээр алба хаагчдын амь насыг хамгаалах, ажлын байрыг нэмэгдүүлэх ач холбогдолтой гэж үздэг аж.