АНУ-ын ерөнхийлөгч Дональд Трамп ойрын холбоотон байсан Илон Маскийн улс төрийн шинэ нам байгуулах төлөвлөгөөг шүүмжиллээ.

Тодруулбал Илон Маск Трампын санаачилсан төсвийн тухай хуулийн төслийг шүүмжилж, батлагдвал улс төрийн шинэ нам байгуулахаа мэдэгдэж байв.

Улмаар энэ хуулийг баталсны дараа Илон Маск Америк нам /America Party/-ыг байгуулж буйгаа зарласан.

Энэ талаар Трамп “Гуравдагч нам байгуулах гэдэг бол үнэхээр инээдтэй санаа. АНУ үргэлж хоёр намтай байсан. Гуравдагч нам нэмэгдэх нь зүгээр л хүмүүсийг будилуулна гэж би бодож байна” гэсэн юм.

Үүнийхээ дараа өөрийн цахим хуудаст "Илон Маск бүрэн утгаа алдсан мэт болчихлоо. Сүүлийн таван долоо хоногт тэр яг л галт тэрэгний осол шиг байлаа. Үүнийг нь харахад үнэхээр гунигтай байна” хэмээн бичжээ.

Трамп энэ сарын 4-нд баталсан татвар болон төсвийн шинэ хуульд цахилгаан машинд ногдуулж байсан татварын хөнгөлөлтийг цуцалсан.

Мөн шинэ хуульд хил хамгаалалт, батлан хамгаалах, эрчим хүчний үйлдвэрлэлд зарцуулах зардлыг нэмэгдүүлсэн ч эрүүл мэнд, хүнсний тусламжийн зарим хөтөлбөрт таналт хийсэн нь маргаан дагуулаад буй.

Талууд өмнө нь төсвийн хуулийн төсөлтэй холбоотойгоор бие биедээ хаяглан ширүүхэн үгс илгээж байсан ч удалгүй чимээгүй болсон. 

Харин өнгөрсөн долоо хоногоос Маск хуулийн төслийг дахин шүүмжилж эхэлсэн юм. 

Эх сурвалж: ВВС