Ерөнхий сайдыг огцруулахыг шаардсан жагсаал гурав дахь өдрөө үргэлжилж байна.

Монгол Улсын Ерөнхий сайд Л.Оюун-Эрдэнийг огцруулахыг шаардаж иргэд Нийслэлийн төв талбайд жагсаж байгаа билээ. Жагсаалд ирсэн хүмүүс өөрсдийн үзэл бодол, дуу хоолойгоо илэрхийлж, шаардлагад нэгдэн гарын үсэг зурж байна.

Өнөөдрийн жагсаалд шог зураач, уран бүтээлч С.Цогтбаяр гуай ирсэн байлаа. Тэрбээр уг жагсаалыг зохион байгуулагч залуусыг дэмжиж буйгаа илэрхийлж өөрийн зурсан шог зургийг хэвлэсэн футболк бэлэглэлээ.

Тэрбээр "Залуус үндсэн хуулиар олгогдсон эрхээ эдэлж үг хэлээр үзэл бодлоо илэрхийлж тайван жагсаал цуглаан хийж буйд талархаж байна. Энэ нь том үйлийн эхлэл байх болтугай. Шударга бус байдлыг мэдэж байгаа хэр нь хүмүүс нэгдэж эхлүүлэхгүй л бол өөрчлөлт ирэхгүй. Яг энэ талбай дээр 90-ээд онд яг л энэ залуус шиг хүмүүс олноороо жагсаж цуглан, шаардлага хүргүүлж, өлсгөлөн зарлаж байж нийгмийг өөрчилж байсан. Залуус нэгдэж л өөрчлөлтийг хийнэ. Гэхдээ нам нь, тогтолцоо нь үндсээрээ өөрчлөгдөж байж маш том өөрчлөлт гарах ч эхний алхамд энэхүү шаардлага байх нь зөв. Япон эсвэл БНСУ-д иргэд нь тэр дундаа залуус нь яаж тэмцэж, өөрчилж чаддаг билээ дээ" гэсэн юм.

Жагсагчид Ерөнхий сайдыг огцортол Сүхбаатарын талбайд жагсахаа мэдэгдээд байгаа билээ. АТГ-аас түүнийг болон хүүг нь шалгах үйл ажиллагааг эхлүүлээд байгаа ба хүү нь гадаадаас ирэхээр нь мэдүүлэг авахаар болжээ.