Ерөнхийлөгчийн зарлигаар УИХ-ын гишүүн Л.Энх-Амгаланг төрийн дээд шагнал Сүхбаатарын одонгоор шагналаа.

Тэрээр хууль тогтоох төрийн дээд байгууллага болох УИХ-д дөрөв дэх удаа сонгогдон ажиллаж байна. Нийгмийн хамгаалал, боловсрол, эрүүл мэндийн салбарын багц хуулиуд, байгаль орчин, хөдөө аж ахуй, төсөв санхүү, эдийн засгийн чиглэлийн хуулийн төслийн багт ажиллажээ. 

УИХ-ын гишүүн Л.Энх-Амгалан нүүр номдоо "Монголчууд бид дэлхийн орнуудаас нэг жилийн өмнө танхимын хичээлээ нээж чадсан. Боловсролын багц хуулийг батлуулж, сугалааны цэцэрлэг гэдэг ойлголтгүй болж, цоожтой хаалганы цаана үлддэг хүүхэд гэж байхгүй болсон. 

Боловсролын төсвийг 1,7 их наядаас 4,3 их наяд болгож 3 дахин нэмэгдүүлж, байгууллага, барилга санхүүжүүлдэг байсан хувьсах зардлыг хүүхдээ, багшаа, хүнээ дагасан санхүүжилтийн тогтолцоонд шилжүүлж, багшид хичээл практикийн олон төрлийн зардлууд очдог, багш өөрөөсөө мөнгө гаргаж хичээлийн хэрэглэгдэхүүнээ авдаг байдлыг зогсоосон. 

Багшийн нийгмийн баталгаа, цалин хөлс гэсэн үндсэн чиглэлээр хэрэгжүүлж, таван жилийн урамшуулал цалинг 2 дахь удаагаас нь 3 жил тутамд авдаг болгосон. 

Улсын хэмжээнд 700 гаруй сургууль, цэцэрлэг, дотуур байрны нүхэн жорлонг халж, тохилог ариун цэврийн өрөөтэй болж, ерөнхий боловсролын сургуулиудад сэтгэлзүйч ажиллаж эхэлсэн.  Хичээлээ сонгон суралцах боломжгүй 15 мянга 265 хүүхэдтэй мэдлэ цахим сургууль нээгдсэн. 

Хувийн сургуулиудын өндөр төлбөртэй их британийн Pearson англи хэлний цахим сургалт, финланд улсын Eduten математикийн хөтөлбөрийг төрийн өмчийн бүх сургуульд нэвтрүүлж, үе шаттайгаар хамрах хүрээг нэмэх боломжтой болгосон. Монгол улсын боловсролын салбарын цахим шилжилтийг ГИУЫЁҮ үнэлж, “Сhampion” орноор нэрлэсэн. 

Англи улсаас манай улсад англи хэлний хөтөлбөр хэрэгжүүлэхэд зориулж 10 сая фунтийн дэмжлэг үзүүлсэн. Монгол анх удаа олон улсын сурлагын амжилтын PISA судалгаанд хамрагдлаа. Ингэснээр хүүхдүүдийнхээ чадварыг зөв оношилж, хөтөлбөр, бодлого зөв чиглүүлэх боломж бүрдсэн. 

Боловсролын салбарын мэдээллийн санг нэгтгэж, их өгөгдлийн цахим систем хөгжүүлж, багш, сурагчдын ахиц, амжилтыг нэг бүрчлэн харах боломж нээгдсэн. 88 их дээд сургуулийн сургалтын үйл ажиллагаанд чанарыг хянаж, чанаргүй их дээд сургуулийн үйл ажиллагааг зогсоосон. 

Анх удаа их дээд сургуулиудын эрэмбийг зарлаж, олон улсын Times higher education байгууллагаас арга зүйн зөвлөгөө авсан.  Их сургууль, мэргэжлийн боловсрол гэсэн үндсэн хоёр чиглэлийн тогтолцоонд шилжүүлж, оюутнууд коллежоос их сургуульд дэвшин суралцах 2+2 хөтөлбөрийг хэрэгжүүлэхээр болсон.

Багшийн гурван тулгуурт бодлогыг багш бэлтгэх, багшийн тасралтгүй хөгжил, багшийн нийгмийн баталгаа, цалин хөлс гэсэн үндсэн чиглэлээр хэрэгжүүлж, таван жилийн урамшуулал цалинг хоёр дахь удаагаас нь гурван жил тутамд авдаг болгосон гэжээ.