УИХ-ын өнөөдрийн чуулганаар дараах асуудлуудыг хэлэлцэнэ. 

• “Тогтоолд нэмэлт оруулах тухай” Улсын Их Хурлын тогтоолын төсөл /Засгийн газар 2025.11.19-ний өдөр өргөн мэдүүлсэн, хэлэлцэх эсэх, асуулт, хариулт 120 минут/
• “Монгол Улсыг 2026-2030 онд хөгжүүлэх таван жилийн үндсэн чиглэл батлах тухай” Улсын Их Хурлын тогтоолын төсөл /Засгийн газар 2025.10.30-ны өдөр өргөн мэдүүлсэн, эцсийн хэлэлцүүлэг/

"Ажлын хэсгийн тоо ихдээд, яаман дээр бараг хүн алга"

УИХ-ын гишүүн Ц.Баатархүү "Монголын парламент сүүлийн үед хууль санаачлах, бодлого, хөтөлбөр хэлэлцэхээс илүү байнга албан тушаал хэлэлцдэг боллоо. Энэ намрын чуулган албан тушаал хэлэлцдэг, огцруулдаг чөлөөлдөг, томилдог чуулган болж хувирч байна. Монголчууд УИХ-аас иргэдийн амьдралд хэрэгтэй маш олон зүйлийг хүлээж байгаа" гэв. 

УИХ-ын дарга Н.Учрал: "УИХ ямар ямар хууль баталсныг дүгнэх хэрэгтэй. Ажлын хэсэг байгуулж, анхааралтай ажигласнаараа бол тоогоо алдсан юм байна. УИХ-ын даргын захирамжаар батлагдсан ЗГ-ын ажилтай зэрэгцэж төрийн албан хаагчдыг тал талд дууддаг байдлыг зогсооно. Төрийн албан хаагчдыг ажлын хэсэг нэрээр тэр дуудсан, энэ ч хуралд сууж байгаа гээд Засгийн газар, УИХ-ын чуулганд ч дууддаг. Яаманд ажлаа хийж байгаа хүн алга. Би өнөөдөр УИХ-ын даргын захирамжаар байгуулсан 58 ажлын хэсгийг цуцална. Бүгдээрээ хийх ажлаа л хийе. Юу хийхээ мэдэхээ болилоо гэхэд юу хийхгүй вэ гэдгээ мэддэг байя. Өнөөдөр ажлын хэсгүүдийг цөөлж 7-10 тоонд барина, үүнээс цааш хэтрэхгүй" гэлээ. 

Үндсэн хуулийн цэцийн гишүүн Л.Өлзийсайханыг үүрэгт ажлаас нь чөлөөлөх асуудлыг УИХ-ын чуулганаар хэлэлцэж байна. Хэрэв чөлөөлбөл УИХ-ын Тамгын газрын ерөнхий нарийн бичгийн даргаар дахин томилох эсэхийг хэлэлцэх юм.

Гишүүдийн 64,2 хувийн саналаар түүнийг Үндсэн хуулийн цэцийн гишүүний үүрэгт ажлаас нь чөлөөллөө.

ЛУВСАНДОРЖИЙН ӨЛЗИЙСАЙХАН

Боловсрол:

• 1993 онд Нийслэлийн 50 дугаар дунд сургууль;
• 1998 онд Монгол Улсын Их Сургуулийн Хууль зүйн сургуульд хууль зүйн бакалавр;
• 1999 онд Монгол Улсын Их Сургуулийн Хууль зүйн сургуульд хууль зүйн магистр;
• Эрх зүйч мэргэжилтэй, хууль зүйн ухааны доктор (Ph. D), дэд профессор.

Ажилласан байдал:

• 1998-2002 онд Улсын Багшийн Их Сургуульд багш;
• 2002-2016 онд Монгол Улсын Их Сургуулийн Хууль зүйн сургуульд багш, ахлах багш;
• 2007-2012 онд Улсын Их Хурлын Тамгын газарт зөвлөх, Экспертийн хэсгийг хариуцсан ахлах зөвлөх;
• 2012 онд Монгол Улсын Их Хурлын даргын Хууль зүйн бодлогын зөвлөх;
• 2013-2015 онд Шүүхийн ерөнхий зөвлөлийн Шүүхийн хүний нөөцийн газрын дарга;
• 2015-2017 онд Нийслэл дэх Захиргааны хэргийн анхан шатны шүүхийн шүүгч;
• 2017-2018 онд Улсын Их Хурлын Тамгын газарт Төрийн байгуулалтын байнгын хорооны ажлын албаны ахлах зөвлөх;
• 2018-2019 онд Засгийн газрын Хэрэг эрхлэх газрын Стратегийн удирдлага, зохицуулалтын газрын дарга;
• 2019 онд Монгол Улсын Их Хурлын даргын ахлах зөвлөх бөгөөд ажлын албаны дарга;
• 2019-2023 онд Монгол Улсын Их Хурлын Ерөнхий нарийн бичгийн дарга.

Монгол Улсын Гавьяат хуульч цолтой.

Монгол Улсын Их Хурлын санал болгосноор Монгол Улсын Их Хурлын 2023 оны 11 дүгээр сарын 16-ны өдрийн 96 дугаар тогтоолоор Монгол Улсын Үндсэн хуулийн цэцийн гишүүнээр томилогдон ажиллажээ.

УИХ-ын Тамгын газрын ерөнхий нарийн бичгийн даргаар Л.Өлзийсайханыг томилох эсэхийг хэлэлцэх асуудлыг УИХ дахь АН-ын бүлгийн дарга Х.Тэмүүжин түр хойшлуулах саналыг дэвшүүллээ.

Учир нь АН-ын бүлгийн зарим гишүүн гадаад томилолттой явж байгаа учир ирэх даваа гарагт АН-ын бүлгийн хуралдаанд бүрэн бүрэлдэхүүнээрээ хэлэлцэж байж санал өгнө гэв. Харин УИХ-ын дарга Н.Учрал "УИХ-ын ерөнхий нарийн бичгийн албан тушаалын томилгоонд улс төрийн шийдвэр гаргаж болохгүй. УИХ-ын ерөнхий нарийн бичиг, тэргүүн дэд байхгүй ажил цалгардаад байна. Томилгоог яаралтай хийх шаардлагатай. АН-ын бүлэгт хуралдах хоёр цагийн хугацаа өгье" хэмээн алх цохилоо.