OpenAI компанийн мэдээлснээр долоо хоног бүр 230 сая хүн эрүүл мэндтэй холбоотой асуултууд асуудаг байна. ChatGPT-г бүтээсэн тус компани хүмүүсийн эрүүл мэндийн бүртгэл мэдээлэлд дүн шинжилгээ хийж, хариулт өгдөг шинэ үйлчилгээгээ АНУ-д нээлээ. 

Эрүүл мэндийн мэдээллээс нь гадна хоолны дэглэмээ ч хуваалцахыг хүсэж, хүн бүрд тусгайлсан зөвлөгөө өгнө. ChatGPT Health буюу ChatGPT эрүүл  мэнд гэсэн нэртэй энэ үйлчилгээнд ирүүлсэн мэдээллийг нууцална, хиймэл оюун ухааныг сургахад ашиглахгүй гэж мэдэгдэв. 

Мөн онош тогтоох, эмчилгээний зорилгоор дээрх чаатын өгсөн зөвлөгөөг ашиглахгүй байхыг анхааруулжээ. Энэхүү шинэ үйлчилгээг бусад улсуудад нээх, эсэх, тийм бол хэзээ нээх нь тодорхойгүй байна. Эрүүл мэндийн мэдээлэл нь хүний эмзэг, хувийн мэдээлэлд тооцогддог тул маш нууц байх шаардлагатай. Иймд зарим хүн энэ үйлчилгээнд эргэлзэж, OpenAI хүн бүрд тусгайлан, хувийн шинж чанартай үйлчилгээ үзүүлэх зорилготой байгааг шүүмжилжээ. 

Мөн ChatGPT болон ChatGPT Health тус тусдаа санах ойтой байх уу, нэгэнтэй нь хийсэн яриаг нөгөө нь санаж, харилцан яриандаа ашиглах уу гэх мэт олон асуултыг дагуулав.

ChatGPT Health эмзэг мэдээллийг нууцлах, сайн хөгжүүлсэн хамгаалалттай гэж компани мэдэгджээ. Мөн бид эмч нарын ажлыг булаахгүй, харин тэдэнд дэмжлэг үзүүлэхийг зорьсон гэсэн байна.    

Иргэд Apple Health, Peloton, MyFitnessPal гэх мэт эрүүл мэндийн аппликэйшний мэдээллээ ч ChatGPT Health-д хуваалцах боломжтой. 

Шинэ үйлчилгээг танилцуулсны дараа хиймэл оюун ухаан эрүүл мэндтэй холбоотой буруу зөвлөгөө өгвөл яах вэ? Тэд буруу мэдээлэл өгч, иргэдийг ятган үнэмшүүлж чадах уу, итгэж болохуйц зөвлөгөө өгөх үү, зах зээлд ямар нөлөө үзүүлэх вэ  гэх мэт хэлэлцүүлгүүд өрнөж байна. 

Эх сурвалж: BBC