Засгийн газрын ээлжит хуралдаанаас гаргасан шийдвэрийг танилцуулж байна.

Эрүүл мэндийн салбарт авч хэрэгжүүлэх арга хэмжээний тухай - Эрүүл мэндийн сайд Э.Батшугар танилцууллаа.

Тэрээр, Өнөөдөр иргэд анхан шатны эмнэлэгт шинжилгээ өгөөд, дараагийн шатны эмнэлэгт очихдоо яг ижил шинжилгээг дахин өгөх тохиолдол түгээмэл байна. Зарим тохиолдолд нэг иргэн цусны дэлгэрэнгүй шинжилгээг 39 удаа давтан өгсөн үзүүлэлт ч бий. Шинжилгээний хариу автоматаар дараагийн шатны эмнэлэг рүү шилждэг болно. Рентген болон бусад оношилгоог дахин хийлгэх шаардлагагүй болно. 

Эмнэлгүүдийг харахад менежментийн хувьд сайн ч, муу ч эмнэлгүүд байна. Яг адилхан тусламжийн үйлчилгээг хүн амд үзүүлдэг хэр нь зарим нь илүү ашигтай ажиллаж, зарим нь 20 тэрбум төгрөг хүртэл алдагдалтай ажиллаж байна. Үүнээс тухайн эмнэлгийн бүтээмж, менежмент муу байгааг харуулж байна.

Манай улсад 39 мянган эмч, сувилагч бий. Үүний цалинг нэг шатлалт болгохын тулд 150 тэрбум төгрөг шаардлагатай. Эрүүл мэндийн даатгалын сангийн нийт тооцоог хянаж, хэд хэдэн арга хэмжээг авч болох боломжтойг харсан. Цогц арга хэмжээг авснаар хэмнэсэн мөнгөөр эмч, ажилчдын цалинг нэмнэ.

Эрүүл мэндийн салбарын эмч, ажилтнуудын цалинг 2026 оны

• Нэгдүгээр сарын 1-нээс 30 хувь,
• Наймдугаар сарын 1-нээс 9 хувь,
• Есдүгээр сарын 1-нээс 9 хувиар нэмж,
• Арваннэгдүгээр сарын 1-нээс цалингийн нэмэгдлийг 75 хувьд хүргэх шийдвэр гаргасан. Гэтэл нэмэгдэл цалинг өмнөх нэмэгдээгүй цалингаас бодож байна.

Эмч, ажилтнуудыг нэг ижил цалингийн шатлалтай болгоход 150 тэрбум төгрөг шаардлагатай байгаа. Би өмнө нь Эрүүл мэндийн даатгалын сангийн асуудалтай танилцаж байгаагаа хэлж байсан. Ингэхэд авч хэрэгжүүлж болох хэд хэдэн арга хэмжээ харагдсан.

Цогц арга хэмжээ авсны үр дүнд 150 тэрбум төгрөг хэмнээд эмч, ажилтнуудын цалинг нэмэх боломжтой болно. Ингэхийн тулд лавлагаа шатлалын эмнэлгийн гүйцэтгэлийн санхүүжилтийг 100 орчим сая төгрөгөөр нэмэгдүүлнэ. Ингэснээр 40 орчим тэрбум төгрөг хэмнэгдэнэ.

Хамгийн чанартай эм зардаг эмийн хатуу зохицуулалттай  АНУ, Герман зэрэг улс орноос эм нийлүүлэх бол татвараас эхлээд бүх төрлийн хөнгөлөлт үзүүлнэ. Харин эмийн зохицуулалтгүй, хямдхан, чанаргүй эм зардаг газраас эм нийлүүлэх бол ямар ч хөнгөлөлт огт үзүүлэхгүй. Манайд 669 эмийг хөнгөлдөг. Үүнд ДЭМБ-д бүртгэлгүй эмүүд байна. Тэдгээр эмүүдийг хасна" гэв.