Иргэн Э.Х 2024 оны нэгдүгээр сард, ес эхэлсэн үед гэртээ гал түлж гэрээ дулаацуулж, хүүхдүүддээ халуун хоол цай хийж өгөөгүйгээс шалтгаалан 1 нас, 4 capтай Г.Г гэртээ осгож, амиа алджээ. Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхээс Э.Х-г Эрүүгийн хуулийн тусгай ангийн 16.11 дүгээр зүйлийн 3 дахь хэсэгт зааснаар 2 жилийн хорих ялаар шийтгэсэн байна.

Учир нь, шүүгдэгч Э.Х нь:

• Монгол Улсын Үндсэн хуулийн 17 дугаар зүйлийн 1 дэх хэсгийн 1 дэх заалтад “Монгол Улсын иргэн... үр хүүхдээ өсгөн хүмүүжүүлэх... нь иргэн бүрийн журамт үүрэг мөн” гэж,
• Гэр бүлийн тухай хуулийн 26.2 дугаар зүйлийн 26.2.1-д “Хүүхдээ эрүүл чийрэг өсгөн бойжуулах, сэтгэхүйн хувьд төлөвшүүлэх”,
• Хүүхдийн эрхийг хамгаалах тухай хуулийн 5 дугаар зүйлийн 5.2 дахь хэсэгт “...Хүүхэд эрүүл өсөж бойжих, аюулгүй орчинд амьдрах, ...", 5.3 дахь хэсэгт “...Хүүхэд эцэг эхтэйгээ амьдрах, тэдний анхаарал халамжид байх... эрхтэй...” гэж, 10 дугаар зүйлийн 10.1.3 дахь заалтад “...эцэг, эх... нь хүүхдийн хөгжил эрүүл мэндэд сөрөг нөлөө үзүүлж болзошгүй эрсдэлт нөхцөлөөс урьдчилан сэргийлэх, хамгаалах...” гэж хуулиар хүлээсэн асран хамгаалах үүргээ биелүүлээгүйн улмаас бага насны хүүхэд нас барсан гэмт хэргийг үйлджээ.

Насанд хүрээгүй гэрч "...хоёр хоног архи уусан, дүү бид хоёрт хоол хийж өгөөгүй.  Өчигдөр дүү маань орон дээр хэвтээд унтаад байсан, нартай байхад хүртэл унтаад байсан. Дүү бид хоёр их даарч, өлссөн, би цуйван идмээр байсан, би ... хоол хийж өгөөч, өлсөөд байна гэхэд хоол хийж өгөөгүй. 

Өчигдөр ...дүү бид гурав харанхуй болчихсон байхад орондоо орсон, гэр хүйтэн болохоор шөнө даараад 1 удаа сэрээд буцаад унтсан, өглөө сэрэхэд дүрэмт хувцастай ах нар ирчихсэн байсан" гэж мэдүүлжээ. 

Цаг уур, орчны шинжилгээний газрын мэдээгээр хэрэг гарсан өдөр буюу 2024 оны 01 дүгээр сарын 07-08-нд шилжих шөнө ...дүүрэг орчмоор 0.0 мм цас орж, 21-28 градус хүйтэн хоносон байна.