Японы Хөдөө аж ахуйн сайд Такү Это өнгөрсөн ням гарагт Сага мужид болсон уулзалтын үеэр  “Би будаа худалдаж авч үзээгүй” гэж хэлсэн нь шүүмжлэл дагуулж улмаар өнөөдөр огцорлоо. Будааны үнэ өнгөрсөн жилийнхээс хоёр дахин өссөн нь бодит орлого нь өсөхгүй байгаа Япончуудын хувьд чухал асуудал болоод байгаа билээ.

Өнөө өглөө Ерөнхий сайдын ажлын өрөөнд огцрох хүсэлтээ өгсний дараа Такү Это сэтгүүлчдэд ярилцлага өгөв. Энэ үеэр тэрбээр "Будааны үнэ тэнгэрт хадсан энэ үед би туйлын зохисгүй мэдэгдэл хийсэн. Үүнийхээ төлөө чин сэтгэлээсээ уучлалт хүсэж байна. Би энэ хүнд цаг үед салбараа удирдаж чадах  эсэхдээ эргэлзэж эцэст нь ийм шийдвэр гаргалаа” хэмээн огцрох шалтгаанаа тайлбарлав.

Ерөнхий сайд Ишиба ч мөн мэдэгдэл хийж, “Энэ томилгоог хийсэн хариуцлагыг би бүрэн хүлээнэ. Олон нийтийн шүүмжлэлийг хурдан хүлээн авлаа” хэмээжээ. Энэ үйл явдал Ерөнхий сайд Шигэру Ишибагийн олонхын суудалгүй Засгийн газарт дахин дарамт учруулав. Долоодугаар сард болох улс төрийн сонгуулийн өмнөх энэ үйл явдал тус танхимд шинэ сорилт дагуулж байна.

Такү Это сайдын огцролт нь Ерөнхий сайд Ишиба Засгийн газраа байгуулснаас хойш сайд сайн дураараа, хугацаанаасаа өмнө албан тушаалаа өгсөн анхны тохиолдол болж байна.

Эх сурвалж: AP, Reuters