УИХ-ын чуулганы нэгдсэн хуралдаан 10:00 цагаас эхэлнэ. Өнөөдрийн хуралдаанаар Засгийн газрын гишүүдийг чөлөөлөх, томилох талаарх Монгол Улсын Ерөнхий сайдын танилцуулгыг хийнэ. 

Өнөөдрийн хуралдаанаар хэлэлцэх асуудлуудын жагсаалт: 

• Засгийн газрын гишүүдийг чөлөөлөх, томилох талаарх Монгол Улсын Ерөнхий сайдын танилцуулгаНийгмийн хамгааллын тухай Монгол Улс болон Бүгд Найрамдах Австри Улс хоорондын хэлэлцээр соёрхон … /Засгийн газар 2025.12.26-ны өдөр өргөн мэдүүлсэн, соёрхон батлах/
• Монгол Улсын Үндсэн хуулийн цэцийн 2025 оны 11 дүгээр дүгнэлт /Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн 40 дүгээр зүйлийн 40.1.2 дахь заалт Монгол Улсын Үндсэн хуулийг зөрчсөн эсэх маргааныг хянан шийдвэрлэсэн тухай/
• Монгол Улсын Үндсэн хуулийн цэцийн 2025 оны 12 дугаар дүгнэлт /Монгол Улсын Их Хурлын чуулганы хуралдааны дэгийн тухай хуулийн 101 дүгээр зүйлийн 101.1, 102 дугаар зүйлийн 102.1 дэх хэсгийн холбогдох зохицуулалт Монгол Улсын Үндсэн хуулийг зөрчсөн эсэх маргааныг хянан шийдвэрлэсэн тухай/
• Монгол Улсын Үндсэн хуулийн цэцийн 2026 оны 01 дүгээр дүгнэлт /Үндсэн хуулийн цэцэд маргаан хянан шийдвэрлэх ажиллагааны тухай хуулийн 14 дүгээр зүйл Монгол Улсын Үндсэн хуулийг зөрчсөн эсэх маргааныг хянан шийдвэрлэсэн тухай/
• Бусад

УИХ-ын чуулган 10:00 цагаас эхлэх товтой байсан ч ирц хүрээгүйн улмаас 10:30 цаг хүртэл эхлээгүй байна. 10:30 цагийн байдлаар 126 гишүүнээс 47 нь ирцээ бүртгүүлж, ирц 37.3 хувьтай байна. 

Даваа гарагт УИХ дахь АН-ын бүлгээс УИХ-ын дарга Н.Учралыг ажлаа өгөх хүртэл АН-ын бүлгийн гишүүд чуулганы хуралдаанд суухгүй гэдгээ мэдэгдсэн. 

УИХ-ын чуулганы нэгдсэн хуралдаан 10:59 цагт эхэллээ. 

УИХ-ын дарга Н.Учрал: УИХ дахь АН-ын бүлгээс шаардлагаа хэвлэлээр тавьсан гэж ойлгосон. Би хууль сануулъя. УИХ-ын гишүүн нэгдсэн хуралдаанд оролцох үүрэгтэй. Дэгийн тухай хуулийг танилцуулъя. АН-ын бүлгийн шаардлага хуульд тусгагдсан бол хуулиа биелүүлэх ёстой. Гэсэн хэдий ч аль нэг намын бүлгийн дарга парламентын дарга байх ёсгүй гэсэн хууль одоохондоо байхгүй. Таван намын бүрэлдэхүүнтэй парламентын хувьд мэтгэлцээний зарчмаар асуудлаа хэлэлцэх ёстой гэдэг байр суурьтай байна. 378 хуульд хиймэл оюун ухаанд суурилсан шинжилгээ хийж байна. D-Parliament амилж эхэлж байна. УИХ-ын гишүүн Х.Тэмүүжин цэцийн дүгнэлтийг танилцуулах ёстой. Намын дотоод сонгууль, улс төр яах вэ, ажлын хэсгийг ахалж байгаа гишүүд ажлаа явуул гэж хэлье. Л.Мөнхбаясгалан гишүүн танилцуулга хийх ёстой, эрчим хүчний асуудалд С.Цэнгүүн гишүүн, эдийн засгийн эрх чөлөөний асуудлаар Ч.Лодойсамбуу гишүүн гээд танилцуулах ёстой асуудлууд байгаа. Тиймээс таван намын төлөөлөл чуулганы хуралдаанд оролцож байж бид явж байгаа хуульдаа байр сууриа илэрхийлээд явъя. 

Бид АН-ын бүлэгт хүндэтгэлтэй хандаж байна, байр суурь илэрхийлэх бүрэн эрхтэй. Гэхдээ хуулийн төслүүдэд байр сууриа илэрхийлээд явах хэрэгтэй. Хуульд тусгагдсан эрх үүргийг нэхвэл хүлээн авах боломжтой. Зөвхөн Н.Учралд үйлчилдэг хууль, зарчим гэж байхгүй. Намайг анх АН-ын бүлэг ч дэмжээд УИХ-ын дарга болгосон. Тиймээс хамтран ажиллаж, зарчмын хүрээнд асуудлуудаа ярилцаад явах хэрэгтэй гэж бодож байна. Би ардчилсан нийгэмд ажиллаж амьдарч, сурсан хүний хувьд  олон ургальч үзэл, дуу хоолойг хүргэхийг хичээдэг. 

Дээр байдаг хаалтыг авчихсан байгаа биз. Тэр дээрээс бичлэг хийж candy crush тоглож байгаа эсэхийг харах боломжтой. Төрсөн өдрийн мэндчилгээг сэргээсэн. 3-р сарын 17-ны өдөр Тогтмолын Мөнхсайханы төрсөн өдөр нь тохиож байна. УИХ-ын гишүүн Т.Мөнхсайханы төрсөн өдрийг тохиолдуулж ирэх 7 хоногт сургуулийн орчинд хүүхдийн эрх, аюулгүй байдлыг хангах тухай хуулийн төслийг хэлэлцэж эхлэх гэж байна. 3-р сарын 20-ны өдөр Хишигдэмбэрэлийн Тэмүүжин гишүүний төрсөн өдөр тохионо. Төрсөн өдрийн мэнд хүргэе. Энд явж байсан хааччихав. Дамжуулаарай. 

УИХ-ын нэгдсэн чуулганы ирц 11:22 цагийн байдлаар 40.5 хувьтай байна. УИХ-ын дарга Н.Учрал ажлын хэсгийн хийж буй ажлуудын талаарх мэдээллийг өгч байна. Тэрбээр ажлын хэсгүүд тун амжилттай ажиллаж байгааг хэлээд УИХ-ын даргын захирамжаар байгуулагдсан ажлын хэсэгт ажиллаж байгаа хүмүүст баяр хүргэв. Мөн өөрийн зүгээс хийх ажлуудаа чуулганы завсарлагааны үеэр сайн хийсэн гэдгээ тодотгов. 

Энэ хавар бол улстөржих биш ажил хийх цаг гэдгийг дахин хэлээд АН-ын зүгээс тавьсан сайд нарын асуудлыг шийдвэрлэж, Ерөнхий сайд хариуцлагаа тооцож, дараагийн хүнээ томилж байгаа гэж ойлгож байна гэв. 

11:42 цагийн байдлаар УИХ-ын чуулгын ирц хүрээгүй хэвээр байгаа бөгөөд 126 гишүүний 52 нь ирцээ бүртгүүлж, 41.3 хувьтай байна. 

11:57 цагийн байдлаар ирц 42 хувьд хүрлээ. 

УИХ-ын чуулганы ирц хүрээгүй тул өнөөдрийн хуралдааныг хойшлууллаа. 

УИХ-ын дарга Н.Учрал "УИХ-ын тухай хуульд зааснаар бүлгийн дарга нар ирц бүрдүүлэх үүрэг хүлээдэг. УИХ-ын чуулганы өнөөдрийн нэгдсэн хуралдааныг хойшлуулж байна. УИХ дахь МАН-ын бүлгийн дарга Ж.Батжаргал, АН-ын бүлгийн дарга О.Цогтгэрэл нар ирцээ бүрдүүл, бүлгүүдийн хуралдааныг хий. төрийн ажил тасралтгүй явах ёстой. УИХ-ын үйл ажиллагааг хэвийн явуулах ёстой. МАН-ын бүлэг ирцээ бүрдүүл. АН-ын бүлгээс бичгээр хүсэлт ирээгүй. Өнөөдрийн хуралдааныг хойшлуулж байна" гэлээ.