Монголын Үндэсний бөхийн холбооноос Сэлэнгэ аймгийн баяр наадмын бөхийн барилдааны талаар албан мэдэгдэл гаргаж, дүрмийн зөрчил гарсан тул түрүүлсэн бөхийн цолыг хүчингүйд тооцжээ.

Тодруулбал, тус наадмын үзүүр, түрүүний барилдаан нь “Үндэсний их баяр наадмын үндэсний бөхийн барилдааны дүрэм”-ийн 4.6.6 дахь заалтыг зөрчсөн байна. Уг заалтад:

“Засуул барилдааныг түр зогсоох үед, эсхүл учраагаа өмсгөлөө засаж байхад болон барилдаан удааширсан үед барьц бариулж байхад мэх хийж унагах тохиолдолд дахин барилдуулна” гэж заасан байдаг.

Гэвч энэхүү заалтыг зөрчин,  өрсөлдөгчөө гэнэдүүлэн давсан тул барилдааны үр дүнг хүчингүйд тооцож, шинээр заан цол хүртсэн аймгийн заан С.Алтанбаярын цолыг аймаг, цэргийн цолтны эрэмбэд тооцохгүй гэв.

2021 онд болсон 512 бөхийн барилдааны тавын даваанд мөн ийм тохиолдол гарчээ. Тухайн үед хөлийн цэцүүд хоёр бөхийг дахин барилдуулахаар шийдвэрлэсэн боловч өвдөг шороодсон бөх татгалзаж байжээ.