Монгол орны байгалийн ургамлын тухай “Шим ертөнц” баримтат киноны “Бэр цэцэг” цувралыг толилуулж байна. Сэтгүүлч Хэнзээгийн Болормаа эх орныхоо байгалийн ургамлыг устахаас нь өмнө дүрс бичлэгийг нь хийж үлдэх, олон нийтэд таниулах, нэн ховор, ховор ургамлыг хамгаалах зорилгоор 2019 оноос өөрийн санаачилгаар “Шим ертөнц” цуврал баримтат киног хийж байгаа юм.

Дэлхий дээр 100-гаад зүйлийн бэрцэцэг тархжээ. Үүнээс манай оронд

• Цомцогт бэр цэцэг Scabiosa comosa
• Шаргал бэр цэцэг Scabiosa ochroleuca 

гэсэн хоёр зүйл нь ургана. Монгол Улсын Засгийн газар 2014 онд бэр цэцгийг “Үндэсний бахархалт цэцэг” хэмээн өргөмжлөн зарласан юм. Цомцогт бэр цэцэг, шаргал бэр цэцгийн аль нэгийг нь онцлоогүй учраас энэ хоёр зүйл хоёулаа Монголын үндэсний бахархалт цэцэг болж байгаа юм.

Манай оронд ургадаг хоёр зүйлийн бэр цэцгийг гаднаас нь хараад, өнгөөр нь шууд ялгаж болно. Цомцогт бэр цэцэг нил хөх өнгөтэй байдаг бол шаргал бэр цэцэг цайвар шаргалдуу цэцэгтэй. Цомцогт бэр цэцэг тал хээр, уулын хээрийн элсэрхэг, хайргархаг хөрсөнд ургана. Шаргал бэр цэцэг манай орны зөвхөн Баруун Хангай, Их нууруудын хотгорын элсэрхэг хөрсөнд таарна. 7-р сарын 10-даас цэцэглэж эхлээд, цувран цэцэглэсээр, 8-р сарын сүүлч хүртэл 2 сар орчим цэцэгтэйгээ байдаг. Монгол орны байгалийг удаан хугацаанд гоёдог цэцэгсийн нэг нь бэр цэцэг юм.

Та гэртээ, хашаандаа ч бэр цэцэг тарьж болно. Гоёл, чимэглэлийн зориулалтаар тарьж, зарах боломжтой. Арчилгаа багатай, ургамлын өвчин бараг тусдаггүй, тэсвэртэй нь бэр цэцгийг Монголын үндэсний бахархалт цэцэг болгоход нөлөөлсөн байдаг юм. Гадаадынхан бэр цэцгийг тарималжуулан, маш олон сорт гаргаж авсан байдаг. Бэр цэцгийг хуримын цэцэг гэж болно.

“Шим ертөнц” баримтат киноны бүх цувралыг Youtube-ээс UdriinSite сувгаар үзнэ үү.

1. Арц
2. Алтанхундгана
3. Бөлбөө
4. Бэрцэцэг
5. Гишүүнэ
6. Гэзэгцэцэг
7. Даланхальс
8. Саахуу
9. Сараана
10. Хаг
11. Хус
12. Хуш
13. Цээнэ
14. Шинэс 
15. Эгэл годил өвс
16. Яргуй