Өнөөдөр буюу 2025 оны наймдугаар сарын 8-ны энэ өдөр “Аавуудын өдөр" тохиож байна. Эл өдрийг дэлхийн 110 гаруй улс орон уламжлал болгон тэмдэглэдэг. Манай улс 2003 онд "Монголын эрэгтэйчүүдийн холбоо"-ны санаачилгаар аавуудын өдрийг тэмдэглэх болжээ.

Анх 1909 онд АНУ-ын Вашингтон мужид амьдардаг Сонора Смарт Додд охин ээжүүдийн өдрийг жил бүр тэмдэглэж байхад, аавуудад зориулсан өдөр байх ёстой хэмээн үзэж, өөрийн аав Уильям Смартын хүндэтгэлд зориулан энэ өдрийг санаачилсан түүхтэй. 

Түүний аав эхнэрээ нас барсны дараа зургаан хүүхдээ ганцаараа өсгөсөн нэгэн байжээ. Ийнхүү Сонора охины санаачилгаар 1910 оны зургаадугаар сарын 19-нд анхны "Аавуудын өдөр"-ийг тэмдэглэсэн аж. Ийн 1972 онд тухайн үеийн АНУ-ын ерөнхийлөгч Ричард Никсон уг өдрийг үндэсний баяр болгон албан ёсоор баталжээ.

Монгол Улс нийт 3,544,835 хүн амтай, үүнээс 1,736,973 нь эрэгтэй. Тэдний 20 гаруй мянга нь өрх толгойлсон аавууд байдаг аж.

Айл гэрийн түшиг тулгуур, үр хүүхдийн нөмөр нөөлөг болсон бүх аавууддаа "Хайр, хүндэтгэлийн өдрийн мэнд хүргэе".

Г.Халиунаа