Тулгар төрийн 2234 жил, Их Монгол Улсын 819 жил, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ой, Үндэсний их баяр наадмаар алдар цуут Дархан аваргуудад хүндэтгэл үзүүллээ. 

Монгол төрийн зүлэг ногоон дэвжээнээ уран сайхан барилдаанаар олон түмнээ баясган бөхийн оргил цолонд хүрсэн Дархан аварга Хорлоогийн Баянмөнх, Дархан аварга Агваансамдангийн Сүхбат, Дархан аварга Гэлэгжамцын Өсөхбаяр нарт хүндэтгэл үзүүлж, гарын бэлэг гардуулсан юм. 

Увс аймгийн Хяргас сумын харьяат Дархан аварга Хорлоогийн Баянмөнх 1971 онд Дархан аварга цолыг хүртсэн бөгөөд 1963 онд улсын начин, улсын заан, 1966 онд улсын арслан, 1968 онд улсын аварга, 1971 онд Дархан аварга цол тус тус хүртжээ. 

Төв аймгийн Сэргэлэн сумын харьяат Дархан аварга Агваансамдангийн Сүхбат 1992 онд аймгийн арслан, 1993 онд улсын начин, 1997 онд улсын заан, 2000 онд улсын арслан, 2001 онд улсын аварга, 2004 онд Далай аварга, 2007 онд Даян аварга, 2014 онд Дархан аварга цолыг тус тус хүртсэн байна. 

Архангай аймгийн Батцэнгэл сумын харьяат Гэлэгжамцын Өсөхбаяр 1994 онд цэргийн заан, аймгийн арслан, 1995 онд улсын заан цолыг хүртэл гурван удаа баталсан бөгөөд 2002 онд улсын арслан, 2005 онд далай аварга, 2009 онд Даян аварга, 2014 онд Дарван аварга цолыг тус тус хүртжээ.