Монголын үүрэн телефоны анхдагч Мобиком Корпорацийн 30 жилийн ойд зориулсан “Мобиком-30 жил” хүчит бөхийн барилдаан өнөөдөр Монгол бөхийн өргөөнд амжилттай болж, өндөрлөлөө. Барилдаан хоёр үе шаттай. Эхнийх нь улс, аймгийн алдар цолтой хүчит 128 бөхийн барилдаан.

Энэхүү барилдаанд Дархан аварга Н.Батсуурь, Улсын аварга О.Хангай, Улсын арслан Б.Орхонбаяр тэргүүтэй чансаа өндөр 128 бөх зодоглолоо.



Нэгийн даваанд Дархан аварга Н.Батсуурь Өмнөговь аймгийн Ноён сумын харьяат, Сумын заан О.Учралбаярт өвдөг шороодож Бөхийн өргөөг шуугиулсан. Мөн үүний араас бөхийн хорхойтнуудын дээгүүр барилдана гэж таамаглаж байсан Улсын заан Б.Бат-Өлзий, Улсын харцага Н.Золбоо тэргүүтэй бөхчүүд өвдөг шороодлоо.

"Мобиком-30 жил" барилдаанд зодоглохоор бүртгүүлсэн бөхчүүдийн нэрсийг харах бол ЭНД дарна уу. 

Нэгийн даваа
Хоёрын даваа 
Гурвын даваа 
Дөрвийн даваа 
Тавын даваа
Зургаагийн даваа 

Зургаагийн даваа буюу Их шөвгийн барилдаанд энэ цагийн эгэлгүй хүчтэнүүд учраа бөхөө өвдөг шороодуулсаар шалгарч үлдэв. Улсын аварга О.Хангай Улсын заан Д.Хүдэрбулгыг, Арслан Б.Орхонбаяр Арслан Э.Батмагнайг давж, үзүүр түрүүнд үлдсэнийг бөх сонирхогчид уухайлан дэмжиж, аварга, арслангууд ч үзэгчдийг суудал дээр нь өндөлзүүлсэн үзүүштэй барилдаанууд үргэлжиллээ.



Хүчит бөхийн барилдааны долоогийн даваа буюу үзүүр түрүүнд Улсын аварга О.Хангай, Улсын арслан Б.Орхонбаяр нар үлдэж, эн тэнцүү хүч шавхсан барилдаан 30-40 минут үргэлжлэв. Барьц булаалдаж, хүч шавхсан эгзэгтэй барилдаанд хоёр бөх нэг хаялцсан ч зэрэг унасан гэж үзэж, Хөлийн цэцийн шийдвэрээр хоёр дахь барилдаанаар түрүү, үзүүр шийдэгдэв. Энэхүү барилдаанд Аварга О.Хангай түрүүлж 30 сая төгрөг,  арслан Б.Орхонбаяр үзүүрлэж 15 сая төгрөгөөр шагнуулав.



Мөн их шөвөгт үлдсэн Арслан Э.Батмагнай, Заан Д.Хүдэрбулга нар тус бүр 5 сая төгрөгөөр шагнууллаа.  

ҮЗЭГЧДИЙГ ӨНДӨЛЗҮҮЛСЭН ХАЛЗ БАРИЛДААН 

Чансаа өндөр нийт 16 бөхийн санал асуулгыг 03 дугаар сарын 13-наас 21-ний өдрийг хүртэл үзэгчдийн дунд явуулж, хамгийн олон санал авсан эхний дөрвөн бөхийн халз барилдаан энэ өдрийн онцгой барилдаан байлаа. 

Халз барилдаанд:  

• Улсын заан М.Лхагвагэрэл- 43781
• Улсын аварга О.Хангай-  39481
• Улсын арслан Б.Орхонбаяр- 39472
• Улсын арслан Э.Батмагнай- 38662 саналаар эхний дөрөвт багтаж, барилдсан юм. 

Үндэсний бөхөө сонирхогч, өнөөдрийн барилдааныг үзэхээр зорин ирсэн үзэгчид "Халз барилдаан л сонирхолтой болно" гэж ярилцах нь сонсогдоно. Эцэст нь үзэгчдийн хүсэн хүлээсэн халз барилдаан эхлэхэд хурсан олон уухайлан дэмжиж, алга нижигнүүлэн ташиж амжилт хүслээ.

Хэн, хэнтэй барилдахыг сугалаагаар шийдсэн бөгөөд Улсын аварга О.Хангай, Улсын заан М.Лхагвагэрэлтэй, Улсын арслан Э.Батмагнай Улсын арслан Б.Орхонбаяртай хүч үзэхээр сугалаа таарсан юм.

Өнөөдрийн нэгэн сонирхолтой барилдаан нь үүний өмнөх 128 бөхийн барилдааны 6-ын даваанд хоёр арслан /Э.Батмагнай, Б.Орхонбаяр/ таарч, Э.Батмагнай өвдөг шороодсон. Харин удалгүй халз барилдаан болоход Э.Батмагнай дахин Б.Орхонбаяртай таарч, даагаа нэхэн түүнийг давсан.

Энэ талаар Улсын арслан Э.Батмагнай сэтгэгдэлдээ "Унасан бөхтэйгөө нэг өдөр дахин барилдаж, даагаа нэхэх сонин л байдаг юм байна.." хэмээсэн юм. 

Дөрвөн хүчтэний халз барилдаанд Улсын арслан Э.Батмагнай түрүүлж, Улсын заан М.Лхагвагэрэл үзүүрлэлээ. "Хангай аварга, Б.Орхонбаяр арслан хоёр 128 бөхийн барилдааны үзүүр түрүүнд үлдэж, багагүй хугацаанд хүч шавхан барилдсан тул аргагүй дээ" хэмээн үзэгчид үнэн хүчийг нь бахдаж, өмөөрөнгүй хөөрөлдөх нь дуулдана. 

Халз барилдааны шагналын сан 40 сая төгрөг
    🏆Түрүү бөх - 20 сая төгрөг
    🥈Үзүүр бөх 10 сая төгрөг 
    🥉Шөвгийн хоёр бөх тус бүр 5  сая төгрөгийн шагнал хүртлээ. 

Тоймыг: Э.Энхмаа, Б.Нямдарь
Гэрэл зургийг: Т.Бархас
Видеог: Д.Орхон