Нийслэлийн Засаг даргын нэгдүгээр орлогч Т.Даваадалай ажлаа хүлээлгэн өгч буйтай холбоотойгоор мэдээлэл өглөө.

Тэрбээр "Нийслэлийн эдийн засгийн хөгжил, дэд бүтэц хариуцсан нэгдүгээр орлогч даргын ажлыг авч бас өгч болдгийг харуулах гэсэн юм. Миний бие ОХУ-ын Ленинград хотод зүтгүүрийн инженерээр суралцаж төгссөн. Мөн Австрали улсад инженерийн болон менежментийн чиглэлээр магистрын зэрэг хамгаалсан. УБТЗ хэмээх том айлд туслах машинчаар анх ажилд ороод Монголын томоохон компаниудад 17 жилийн хугацаанд инженер, төслийн менежер гээд бүтээн байгуулалтын салбарт ажиллаж, бүтээж ирсэн залуу. 

2024 онд боломж олдож МАН-аас БЗД-т нэр дэвшин 16577 хүний саналаар НИТХ-ын төлөөлөгч болж цаашлаад Нийслэлийн Засаг даргын нэгдүгээр орлогч болон ажилласан. 

Миний бие Улаанбаатар хотын 16 том мега төслийн 10-ыг нь эхлүүлсэн. Метро, трамвай, дүүжин тээвэр, тойрог зам, Сэлбэ дэд төв, Туул усан цогцолбор, ТЭЦ-5 зэрэг хотын дэд бүтцийн асуудлыг шийдэх томоохон төслүүдэд анхан шатнаас нь ажиллаж ирлээ.

Улаанбаатарт агаарын бохирдол, түгжрэл гэсэн хоёр л дайсан бий. 

2025 оны төгсгөлөөс эхлээд МАН-ын дарга бөгөөд Улаанбаатар хотын захирагч Х.Нямбаатарын албан тушаал руу дайрсан, эрх мэдэлд шунасан, ажил хийж үзээгүй, одоо Засгийн газрын гишүүн хийж байгаа Э.Бат-Амгалан болон түүний утсан хүүхэлдэй А.Баяр тэргүүтэй бүлэг этгээдүүд бид бүгдийг харлуулж, гүтгэж ирлээ. 

Миний хувьд гүтгүүлж, өнгөрсөн жил талбай дээр ТҮЦ-нийхэнд зодуулж, энэ жил УИХ-ын гишүүнд тархиндаа хөнгөн гэмтэл авах хүртлээ мөргүүлж ажиллаж ирлээ. Эр хүний хувьд гомдолгүй. Мэдээж ийм албан тушаал эрхэлж байгаа хүн иймэрхүү асуудлыг туулаад гарах нь зайлшгүй. 

Сүүлийн үед "Туулаа аваръя" гээд байгаа Хариад Уянга гэх жүжигчин, мэдрэл муутай хүүхэн болон Лут-Очир гээд хүмүүс нийгэмд бүтээн байгуулалт хийж байсныг мэдэхгүй юм байна. 

Намайг Монгол аж үйлдвэрийн түүх, төмөр зам, Оюу толгой, уул уурхайн түүх мэднэ. Надтай хамт ажиллаж байсан инженерүүд гэрчилнэ. Туулаа аваръя гэж жүжиглэж байгаа хүмүүс Э.Бат-Амгалан сайдын өрөөнөөс салахаа больсон. Ийм жүжигчид төслийг улстөржүүлж, гацааж байгаад харамсаж байна. 

Түүнчлэн иргэдийн төлөөлөгчийн хувиар А.Баяр гээд залууд хэлмээр байна. НИТХ-ын 45 төлөөлөгчөөс 35 нь огцруулъя гэж байхад тамгаа аваад зугтаагаад байна. Албан тушаалыг авч бас өгч болдог юм. 

Цагдаагийн ерөнхий газрын хийсэн мэдэгдэлд гайхлаа. Би хууль хүчний байгууллагад хүндэтгэлтэй ханддаг. Тийм ч учраас ажлаа өгч, АТГ-тай хамтран ажиллаж, өөрийн гэм буруугүйг нотолно гэдгээ хариуцлагатайгаар мэдэгдэж байна" гэв.