Израил, Ираны талууд галаа зогсоохоор тохиролцоод буй. Гэхдээ Иран цөмийн хөтөлбөрөө үргэлжлүүлбэл Трамп нутаг дэвсгэрт нь дахин довтолно гэсэн. 

Үүний хариуд Ираны дээд удирдагч Аятолла Али Хаменей  “АНУ дахин Иран руу довтолбол Ойрх Дорнод дахь АНУ-ын цэргийн баазуудыг онилж хариу арга хэмжээ авна” хэмээн анхаарууллаа.

Тодруулбал сэтгүүлчид Трампаас "Иран цөмийн хөтөлбөрөө сэргээвэл дахин довтлох уу" хэмээн асуухад Трамп "Мэдээж" гэсэн хариултыг өгсөн юм.

Түүний хувьд Израилтай галаа зогсоохоор тохиролцсоноос хойш анх удаа олны өмнө гарч мэдэгдэл хийж буй нь энэ юм.

Тэрбээр 12 хоног үргэлжилсэн мөргөлдөөнийг өөрсдийн ялалтаар дууссан хэмээн тунхагласан.

АНУ Ираны цөмийн байгууламжууд руу довтолсны дараа Иран Катар дахь АНУ-ын цэргийн баазууд руу довтолсон. Удалгүй талууд галаа зогсоохоор болсныг Трамп зарласан юм. 

АНУ-ын талаас Иранд хийсэн довтолгоогоо амжилттай болсон, бүх зүйл төлөвлөгөөний дагуу болсон хэмээн мэдэгдсээр буй. Гэхдээ тус довтолгоо ямар ч үр дүнд хүрээгүй хэмээн Ираны дээд удирдагч мэдэгдлээ.

Ираны дээд удирдагч мөргөлдөөн эхэлсэн цагаас хойш нуугдаж буй бөгөөд түүний хаана байгаа байршлийг Ираны тал одоо ч нууцалсаар байна. 

Гэхдээ Трамп түүнийг нуугдаж байх үед хаана байгааг нь мэдэж байгаа ч одоохондоо хөнөөхгүй хэмээн мэдэгдэж байв.

Эх сурвалж: Reuters