АНУ, Израил болон Ираны хооронд үүссэн мөргөлдөөнийг зогсоох 15 заалт бүхий саналыг Вашингтоны талаас Иранд хүргүүлсэн.

Ираны тал уг саналыг хүлээн авсан ч шууд хэлэлцээ хийх бодолгүй байгааг тус улсын Гадаад хэргийн сайд мэдэгджээ. 

Тэрбээр "Зуучлагч улсуудаар дамжуулан мэдээлэл солилцож байгаа нь АНУ-тай хэлэлцээ хийж байна гэсэн үг биш" хэмээн ярьсан байна.  

"Тэд өөрсдийн саналуудыг зуучлагчаар дамжуулан илгээсэн бөгөөд тэдгээрийг дээд удирдлагад уламжилсан. Шаардлагатай тохиолдолд байр сууриа албан ёсоор илэрхийлнэ” гэв. 

15 заалт бүхий уг саналд Ираны баяжуулсан ураны нөөцийг устгах, уран баяжуулалтыг зогсоох, баллистик пуужингийн хөтөлбөрийг хязгаарлах, бүс нутгийн холбоотнуудад үзүүлэх санхүүжилтийг зогсоох зэрэг шаардлагууд багтсан гэх мэдээлэл байна. 

Цагаан ордны хэвлэлийн төлөөлөгч Ираны тал уг шаардлагыг хүлээж авахгүй тохиолдолд цэргийн ажиллагаагаа эрчимжүүлнэ гэдгийг мэдэгджээ. 

Уг саналыг Пакистан улсаар дамжуулан хүргүүлсэн юм байна. 

Бүс нутгийн эх сурвалжуудын мэдээлснээр Иран зуучлагч талуудад АНУ, Израилтай гал зогсох хэлэлцээ хийх болбол Ливаныг ч мөн багтаах ёстой гэсэн шаардлага тавьсан аж. 

Эх сурвалж: Reuters