Монголын бурхны шашны төв Гандантэгчэнлин хийдийн тэргүүн их хамба лам, гавж Д.Чойжамц ламын үүрэгт албанаас чөлөөлөгдөх хүсэлтийг хийдийн захиргааны өргөтгөсөн хурлаар өнөөдөр хэлэлцэв. Захиргааны тэргүүлэгчдийн хурлаар доорх асуудлуудыг шийдвэрлэлээ.

1. Тэргүүн их хамба лам, хичээнгүй зүтгэлт XXIX Хамба номун хан, Соёлын гавьяат зүтгэлтэн, гавж Д.Чойжамц ламын үүрэгт албанаас чөлөөлөгдөх хүсэлтийг ёсоор болгож шийдвэрлэв.

2. Тэргүүн их хамба лам, гавж Д.Чойжамцын нэр дэвшүүлсэн БШДС-ийн багш, лхаарамба Д.Жавзандорж лам нь тус үүрэгт албаны шалгуурт нийцсэн. Хурлын нийт гишүүдийн олонхын дэмжлэг буюу 85.7 хувиар Гандантэгчэнлин хийдийн дараагийн Тэргүүн их хамба лам XXX Хамба номун ханы үүрэгт албанд томилогдов.

3. Тэргүүн их хамба лам XXX Хамба номун хан, лхаарамба Д.Жавзандорж ламыг ширээнд залах ёслолыг билгийн тооллын өлзийт сайн өдөр товлон гүйцэлдүүлэхээр тогтов. Захиргааны тэргүүлэгчдийн өргөтгөсөн хуралд нийт 55 гишүүдийн 89 хувийн ирцтэй хуралджээ.

Эх сурвалж: МБШТ Гандантэгчэнлин хийдийн ХМОНХА