Чингэлтэй дүүргийн гуравдугаар хороонд байрлах Урт цагааны барилгыг нурааж, цэцэрлэгт хүрээлэн байгуулах, эсвэл дахин төлөвлөж барилга барихаар арваннэгдүгээр сарын 3-наас иргэдээс санал авч эхэлсэн. Одоогийн байдлаар 2777 хүн саналаа өгснөөс 2658 нь буюу 96 хувь нь цэцэрлэгт хүрээлэн байгуулахыг дэмжсэн бол үлдсэн нь дахин төлөвлөж барилга барих санал өгөөд буй.

Тус санал асуулгатай холбоотой асуудлаар архитектур, хот төлөвлөлтийн чиглэлээр үйл ажиллагаа явуулж буй Хот төлөвлөгчдийн нэгдсэн холбоо, Урбан иргэдийн форум, Хүрээ архитекторууд ТББ, Антитезиз ателье зэрэг төрийн бус байгууллагууд, судлаачид нэгдэж Нийслэлийн Засаг дарга бөгөөд Улаанбаатар хотын захирагч Х.Нямбаатарт албан шаардлага хүргүүлж, хэвлэлийн бага хурал хийлээ.

Иргэн Ц.Уянга "Бидний хэлж заншсан Урт цагаан үйлчилгээний барилгыг нураах санал асуулыг хотын дарга Х.Нямбаатар зарласан. Ердөө долоо хоногийн хугацаанд санал хурааж, шийдвэр гаргахаар болжээ. Энэ тухай гурав хоногийн өмнө мэдэгдсэн. Урт цагааны барилгыг нурааж, ногоон байгууламж болгох эсвэл 16 давхар үйлчилгээний барилга барих гэсэн хоёр хувилбар тулгаж байна.

Урт цагаан бол Улаанбаатар хотын арилжааны үндсэн гудамж болж үүссэн. Үүнээс улбаалж хотын архитектурын зураг төлөвлөгдөж ирсэн. Улаанбаатар хот үүсэхэд бий болсон барилгыг арчиж, алга болгох гэж байгаа том аюул.
Хотын дарга Х.Нямбаатар хууль хэрэгжүүлж байгаа мэтээр хотын хувь заяаг шийдвэрлэдэг боллоо. Ялангуяа МАН УИХ-д олон суудалтай болсноор хотын өв соёл болсон барилгуудыг иргэдийн оролцоогүйгээр нураадаг байдал нийгэмд тогтлоо.

Мөн 2015 онд Бага тойруугийн гудамжийг хөгжүүлэх зорилгоор ТЭЗҮ гаргасан. Үүнд урт хугацаа, олон хүнтэй баг бүрдүүлж, их мөнгө зарцуулж ажлыг эхлүүлсэн. Тухайн үеийн НИТХ-ын тогтоолоор баталсан. Энэ ажлыг өнөөг хүртэл хөгжүүлж хотын өв соёл, арилжааны гудмыг эвдэлгүйгээр ажиллах нь хотын дарга нарыг үүрэг байсан.

Гэтэл шинэ хотын дарга томилогдоод долоо хоногийн дотор урт цагааныг шууд нураах эсвэл өөрчлөх шийдвэр гаргаж байгаа нь хот байгуулалтын үндсэн агуулгатай нийцэхгүй байна. Иргэдээс санал авч байгаа дүр эсгэлгүй, бодлоо тулгахгүйгээр мэргэжлийн хүмүүсийг оролцуулж шийдвэр гаргахыг шаардаж байна.

Урт цагааны гудамжийг үндсэн агуулгаар нь хөгжүүлж, автомашины хөдөлгөөнийг хорьж, сэргээн засах төлөвлөлт гаргах хэрэгтэй. Хотын үндсэн архитектурын чуулгыг хадгалдаг 500 радиус метр хүрэхгүй газар байгаа. Энэ газрыг өлөн нүдээр харж, улс төрийн шийдвэр гаргахаа боль.

Үнэхээр долоо хоногийн дотор санал асууж, шийдвэр гаргаад 16 давхар барилга барих мөнгөтэй юм бол хотын дэд бүтэцтэй холбогдож байгаа гэр хорооллыг барилгажуулж, дэд бүтцийг сайжруулж, эдийн засгийн чадавхийг нь сайжруулаач" гэв.

Мөн урт цагааныг нураах нь зөвхөн нэг барилгын асуудал биш. Барилгыг тойроод оюун санаа, эдийн засаг, соёлын асуудлууд агуулагдаж байгаа. Эдгээрийг устгаж болохгүй гэдгийг онцоллоо.