Засгийн газрын хуралдаанаас гарсан шийдвэрийг танилцуулж байна. Боловсрол, шинжлэх ухааны сайд П.Наранбаяр эхний мэдээллийг хийж байна. 

Австрали улс нийгмийн сүлжээний үйлчилгээ үзүүлэгч байгууллагууд 16 доош насны хүүхдийг нэвтрүүлэхгүй байх үүргийг хүлээж байгаа. Үүнийг зөрчвөл  33 сая ам.дол хүртэл торгуулийн шийтгэл хүлээхээр зохицуулсан байна.    

Франц, Норвеги, Их Британи, АНУ, Энэтхэг, Бразил зэрэг улс орнууд нийгмийн сүлжээнд оролцож байгаа хүүхдийн эрхийг хамгаалахын тулд ийм арга хэмжээнүүд авч байна.

• 10-18 насны 1129 хүүхдэд судалгаа хийхэд нийгмийн сүлжээнд өнгөрүүлдэг цаг дунджаар 4 цаг байна. 
• Буруу зүйлд уруу татах хандлага гарсан уу гэдэг асуултад 56 хувь нь тийм гэсэн байна.
• Цахим хэрэглээнд тавих эцэг эхийн хяналт заримдаа болон огт үгүй гэсэн хариулт нь нийлээд 70 хувь гарчээ.

• 253 эцэг эхээс судалгаа хийхэд хяналт сул, цахим мэдлэгийн талаар мэдлэг сул байна.

• Харин нийгмийн сүлжээний талаар тусгайлсан хууль гаргахыг эцэг эхчүүдийн дийлэнх нь дэмжжээ.

 МАНАЙ АНХДАГЧ ХУУЛЬ 5 БҮЛЭГ 44 ЗААЛТ БҮХИЙ ХУУЛЬ ЮМ. 

16 хүртэлх хүүхэд буюу "Насны хязгаартай хэрэглэгч" гэсэн ойлголтыг оруулсан. "Насны хязгаарлалттай нийгмийн сүлжээ" гэсэн тодорхойлолтыг Австралийн хуулиас авч Монголын нөхцөлд тохируулан оруулсан. "Насны хязгаартай нийгмийн сүлжээний үйлчилгээ эрхлэгч" гэсэн гурван ойлголт байна.

Зөрчлийн хуулиар эцэг эх болоод хүүхэд ямар нэгэн хариуцлага хүлээхгүй, харин үйлчилгээг үзүүлж байгаа хувь хүн, байгууллага хуулийн этгээдүүд торгуулийн шийтгэл хүлээнэ.

Бид энэ хуулийн үзэл баримтлалыг Цахим хөгжлийн яам, Гэр бүл хөдөлмөр нийгмийн хамгааллын яам, Хууль зүй дотоод хэргийн яам, Боловсролын яам гэсэн дөрвөн яаманд явуулж батлуулсан.

Өнөөдөр Засгийн газарт танилцуулаад Засгийн газраас өргөн барих бэлтгэл ажлыг ханга гэсэн үүргийг авсан.

СУРГУУЛИЙН ЗӨВ СОЁЛ БҮРДСЭН ҮЕД ДЭЭРЭЛХЭЛТ БАЙХГҮЙ БОЛНО.

"Аюулгүй сүлжээ" гэсэн иж бүрэн үндэсний загварыг боловсруулж талуудтай ярилцаж байна. Хүүхдийг аюулгүй байдлыг сургуулийн болон бусад орчинд хамгаалах тал дээр 30 гаруй хууль дүрэм журам гарсан байдаг. Эдгээрийг нэгдмэл загвартай болгож хэрэгжүүлэхгүй бол нэлээн ноцтой нөхцөл байдалд орсон нь харагдаж байна.

Бидэнд бодлого байхгүйдээ биш үүнийгээ хэрэгжүүлэх тогтолцоо байхгүй нь асуудал болоод байна. Хүүхдүүдийн 79 хувь нь дээрэлхэл байдаг, 33 хувь нь сургууль хамгаалдаггүй гэж хариулсан. 

Сургуулийн соёлыг бүрдүүлэхэд хамгийн их анхаарах ёстой. Бусдыг дээрэлхэх доромжлох хэцүү нөхцөл байдлыг үүсгэмээр байна. Өөрөөр хэлбэл зөвийн ноёлол бий болгомоор байна. Хэн нэгэн бусдыг дээрэлхэх үед бусад нь дэмждэггүй, хүлээн зөвшөөрдөггүй байх хэрэгтэй. 

Нэгэнт ийм хэрэг гарсан тохиолдолд сургуулийн нийгмийн ажилтан, захирал, эцэг эхийн төлөөлөл оролцсон баг оруулж ажиллуулах, энэ хэрэг эрүүгийн шинжтэй эрхзүйн чадамж хүлээх боломжтой тул цагдаагаар шийдвэрлүүлэх ёстой. 14-с дээш насны дээрэлхэж байгаа хүүхдийг өмөөрөөд байх ямар ч шалтгаан байхгүй. 

Харин тухайн сургуулиуд энэ дээрэлхэлтийн асуудлаар ямар арга хэмжээ авч байгааг судлуулж арга хэмжээ авах болно.