Тулгар төрийн 2234 жил, Их Монгол Улсын 819 жил, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ой, Үндэсний их баяр наадмын хүчит бөхийн барилдааны зургаагийн даваа эхэллээ. 

Баянхонгор аймгийн Жинст сумын харьяат улсын начин Энхтүвшиний Батмагнай Архангай аймгийн Батцэнгэл сумын харьяат улсын харцага Батсүхийн Зоригтбаатараар зургаа давж улсын харцага цолны болзол хангалаа. 

Тавын даваанд улсын начин цолны болзол хангаад байсан Өвөрхангай аймгийн Хархорин сумын харьяат аймгийн арслан Оюунгэрэлийн Наранбаатар Увс аймгийн Улаангом сумын харьяат улсын гарьд Өлзийтогтохын Бат-Оршихыг өвдөг шороодуулан улсын харцага цолны болзлыг хангаж байна. 

Мөн тавын даваанд улсын начин цолны болзол хангаад байсан Сүхбаатар аймгийн Онгон сумын харьяат аймгийн арслан Нямдоржийн Өсөхбаяр Завхан аймгийн Яруу сумын харьяат улсын заан Мөнхтөрийн Лхагвагэрэлээр зургаа давж улсын харцага цолны болзол хангалаа. 

Улсын начин цолны болзол хангаад байсан М.Бэлгүтэй мөн улсын харцага цолны болзол хангав. Зургаагийн даваанд Сэлэнгэ аймгийн Цагааннуур сумын харьяат улсын арслан Баярсайханы Орхонбаяраар зургаа давлаа.