УИХ-ын чуулганы нэгдсэн хуралдаан үргэлжилж байна. Өнөөдөр дараах асуудлыг хэлэлцэнэ.  

• Сургуулийн орчны эрүүл мэнд, аюулгүй байдлын тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Т.Мөнхсайхан нарын 3 гишүүн 2025.12.31-ний өдөр өргөн мэдүүлсэн
• Нийгмийн хамгааллын тухай Монгол Улс болон Бүгд Найрамдах Австри Улс хоорондын хэлэлцээр соёрхон батлах тухай хуулийн төсөл
• “Тогтоолын хавсралтад нэмэлт, өөрчлөлт оруулах тухай” Улсын Их Хурлын тогтоолын төсөл
• Төрийн нууцын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд 
• Төрийн нууцын жагсаалт батлах тухай хуулийн төсөл 
• Бусад

Улсын Их Хурлын гишүүн Т.Мөнхсайхан нарын 3 гишүүн 2025.12.31-ний өдөр өргөн мэдүүлсэн сургуулийн орчны эрүүл мэнд, аюулгүй байдлын тухай хуулийн төсөл болон хамт өргөн мэдүүлсэн хуулийн төслүүдийг хэлэлцэж байна. 

УИХ-ын гишүүн Т.Мөнхсайхан:
Стандарт шаардлага хангахгүй орчинтой сургууль 50-аас дээш хувьтай байна. Хүүхэд сурч боловсрох гэж очдог сургууль дээрээ очоод амь насаа алддаг асуудал цөөнгүй гарлаа. Энэ нь хэвийн мэт бодож бид тоохгүй өнгөрөөдөг болтлоо нөхцөл байдал  хүндэрсэн байна.

Орон нутагт сумын сургуулиудад дотроо ариун цэврийн өрөөтэй болоход хөрөнгө мөнгө шийддэг ч, нэг жил хэрэглээд тоохгүй орхигддог. Үүнд хариуцлагажуулах тогтолцоог бий болгох хэрэгтэй байна. 

Сүүлийн дөрвөн жилийн хугацаанд сургуулийн орчинд 4 хүүхэд нас барсны нэг нь үе тэнгийн дээрэлхэлттэй холбоотой байна. Өнгөрсөн жил бас нэг аймагт зааланд тоглож байгаад воллейболын шонд даруулж хүүхэд амиа алдсан хэрэг гарсан. 

Сургуулийн цогц үнэлгээ хийхэд 930 оноо авах ёстой бол дунджаар 467 оноо буюу 50,2 хувийн оноо авч байгаа юм. Тэгэхээр хүүхдийн сурах, эрүүл аюулгүй орчныг бүрдүүлж чадахгүй байна.