АНУ-ын ерөнхийлөгч Дональд Трамп Украинтай байгуулах ашигт малтмалын гэрээг ирэх долоо хоногт баталгаажуулна гэдгийг мэдэгдлээ.

Ирэх долоо хоногийн пүрэв гарагт гарын үсэг зурахаар төлөвлөж буйг Трамп Италийн ерөнхий сайдтай уулзсаныхаа дараа сэтгүүлчдэд өгсөн мэдэгдлийнхээ үеэр хэлжээ.

Түүний мэдэгдлийн дараа Украины Эдийн засгийн сайд талууд гэрээний харилцан ойлголцлын санамж бичигт гарын үсэг зурсан талаар цахим хуудастаа мэдээлсэн.

"Бид АНУ-ын түншүүдтэйгээ хамтран Украиныг сэргээн босгох хөрөнгө оруулалтын сан байгуулах болон Эдийн засгийн түншлэлийн гэрээ байгуулах эхлэл болсон санамж бичигт гарын үсэг зурснаа баяртайгаар мэдээлж байна" гэж бичжээ. 

Трамп Украиныг сэргээн босгоход АНУ-аас үзүүлсэн цэргийн тусламжийн хариуд тус улсын байгалийн баялаг, стратегийн ашигт малтмалыг АНУ ашиглах боломжтой гэрээ байгуулахыг эрмэлзэж байгаа юм.

Дэлхийн нийт чухал ашигт малтмалын таван хувь нь Украинд байдаг гэж үздэг. Мөн тус улс нь Европ дахь лити /батарейн гол түүхий эд/-ийн ордуудын гуравны нэгийг эзэмшдэг. 

Үүнээс гадна Украин нь зэвсэг, салхин сэнс болон орчин үеийн бусад чухал бүтээгдэхүүн үйлдвэрлэлд хэрэглэгддэг 17 элементээс бүрдэх ховор металлын ихээхэн нөөцтэй юм.

Цагаан ордноос уг гэрээний агуулгын талаар тодорхой мэдээлэл өгөхөөс татгалзжээ.

Эх сурвалж: Reuters