2026 оны 3-р сарын 4-8-ны өдрүүдэд Австри улсын Вена хотод зохион байгуулагдсан Европын дүрс оношилгооны European Congress of Radiology (ECR) 2026 олон улсын хуралд Монгол Улсаас  НУРА эрт илрүүлгийн төвийн хоёр судалгааны бүтээл шалгарч, дэлхийн радиологийн салбарын мэргэжилтнүүдэд танилцуулагдлаа.

Ийнхүү НУРА төвийн эмч нарын баг хамт олон 2 дахь удаагаа уг хуралд  амжилттай оролцож буй нь Монгол Улсад эрт илрүүлэг, дүрс оношилгооны чиглэлээр хийгдэж буй судалгаанууд олон улсын шинжлэх ухааны түвшинд үнэлэгдэж байгааг харуулсан чухал үйл явдал болж байна. Энэ удаагийн хуралд дэлхийн өнцөг булан бүрээс 11 мянга гаруй судалгааны ажлын хураангуй ирснээс шинжлэх ухааны ач холбогдол, судалгааны чанараар шилдгүүдийг шалгаруулан танилцуулсан юм.

ECR 2026-Д ТАНИЛЦУУЛАГДСАН СУДАЛГААНЫ АЖЛУУД:

ECR 2026 хуралд НУРА эрт илрүүлгийн төвийн  танилцуулсан судалгааны хоёр бүтээл илтгэл нь:

№1: “Хиймэл оюун ухаанд суурилсан бага тунт КТ-ийн шинжилгээгээр ясны сийрэгжилтийг тодорхойлох нь”
Илтгэгч: Б. Чулуун-Эрдэнэ болон баг хамт олон

Энэхүү судалгаа нь бага тунт КТ шинжилгээгээр хавдрын эрт илрүүлэг хийхийн зэрэгцээ хиймэл оюун ухааныг ашиглан ясны сийрэгжилтийг давхар илрүүлэх боломжийг харуулснаараа онцлог юм.

№2: “Хөхний артерийн судасны шохойжилт болон титэм судасны шохойжилтын хамаарлыг үнэлэх нь”
Илтгэгч: Э. Туул болон баг хамт олон

Судалгаанд маммографийн зурагт илрэх хөхний артерийн шохойжилт нь зүрх судасны өвчний эрсдэлтэй хэрхэн холбоотойг үнэлсэн бөгөөд эмэгтэйчүүдийн эрүүл мэндийг цогцоор нь үнэлэх боломжийг харуулжээ.

Эдгээр судалгааны ажлууд нь олон улсын нэр хүндтэй хуралд шалгарсан нь Монголын эмч, судлаачдын мэдлэг, туршлага дэлхийн түвшинд хүрч байгааг харуулж байна. Мөн ясны сийрэгжилт, зүрх судасны өвчнийг эрт илрүүлэх, урьдчилан сэргийлэх аргачлалыг хөгжүүлэхэд чухал хувь нэмэр оруулах юм.

European Congress of Radiology (ECR) нь Европын радиологийн нийгэмлэгээс жил бүр зохион байгуулдаг, дүрс оношилгооны салбарын хамгийн нэр хүндтэй олон улсын хурлуудын нэг юм. Европ дахь хамгийн том, дэлхийн хэмжээнд хоёр дахь том радиологийн чуулганд тооцогддог уг арга хэмжээнд жил бүр 100 гаруй орны 20,000 гаруй эмч, судлаач, мэргэжилтэн оролцдог.

2026 оны ECR их хурлыг “Rays of Knowledge” буюу “Мэдлэгийн туяа” уриан дор зохион байгуулж, радиологийн салбарын мэдлэг, инновац, технологийн дэвшлийг онцлон хэлэлцлээ.